АҚШ президенти Барак Обама 3 сентябрь, чоршанба куни эрталаб бир кунлик ташриф билан Таллинга етиб келди. У ерда Обама Эстония, Латвия ва Литва раҳбарлари билан учрашади, дея хабар бермоқда «РИА Новости».
Air Force One президент самолёти маҳаллий вақт билан 06:22 да (Тошкент вақти билан 08:22 да) қўнди. Аэропортда уни Эстония ташқи ишлар вазири Урмас Паэт кутиб олди. 20 та машинадан иборат президент кортежи аэропортдан чиқиб, Таллин марказидаги Swissotel меҳмонхонасига йўл олди.
АҚШ президенти ташрифининг расмий қисми Эстония раҳбари Тоомас Хендрик Ильвес билан Кадриорг боғи саройидаги учрашув билан бошланади. Сўнг Обама ҳукумат қароргоҳига бориб, мамлакат бош вазири Таави Рийвас билан суҳбатлашади.
Шундан сўнггина Обаманинг Эстония, Латвия ва Литва президентлари Тоомас Хендрик Ильвес, Андрис Берзиньш ва Даля Грибаускайте билан умумий учрашуви бўлиб ўтади. Президентлар матбуот учун биргаликда баёнот беради.
Эстонияга ташриф давомида Барак Обама шунингдек Nordea концерт залида нутқ сўзлайди. Мамлакатни тарк этишдан аввал, Америка президенти бош вазир билан биргаликда 173-АҚШ ҳаво-десант бригадасининг эстониялик ва америкалик ҳарбий хизматчилари билан учрашади. Улар айни пайтда Таллин яқинидаги Эмари авиабазасига жойлашган. Куннинг иккинчи ярмида эса Обама Уэльсга НАТО саммитида қатнашиш учун учиб кетади.
Изоҳ (0)