Украина президенти Пётр Порошенконинг оиласи Ice Bucket Challenge («Бир челак муздек сув синови») акциясида қатнашишга қарор қилди, дея хабар бермоқда Segodnya.ua.
Порошенконинг рафиқаси ва фарзандлари совуқ сувда чўмилди. «Менинг оилам Ice Bucket Challenge чақириғини қабул қилди ва ‘Кўнгиллилар юзлиги’ ҳаракатининг эҳтиёжлари учун маблағ кўчириб ўтказди», — деб ёзди Порошенко ўзининг Facebook’даги саҳифасида.
Эслатиб ўтамиз, Ice Bucket Challenge флешмобининг мақсади ён амиотрофик склероз деб номланган марказий асаб тизими касаллиги ҳақида хабардорликни оширишдан иборатдир. Хайрия кампаниясини қўллаб-қувватламоқчи бўлган кишилар ўз устидан совуқ сув қуйиши ва буни акс эттирувчи видеоёзувни интернетга жойлаши керак. Шундан сўнг улар ўз дўстлари, ҳамкасблари ва шунчаки танишларига бундай чақирувни йўллайди: агар улар 24 соат ичида муздек сувда чўмилмаса, кампания ташаббускори бўлмиш ALS Association фонди ҳисобига 100 доллар ҳажмида хайрия қилиши керак бўлади. Агар чақириқни қабул қилишса, 10 доллар миқдоридаги тўлов билан чекланиш мумкин.
Шарко касаллиги ёки Лу Гериг касаллиги сифатида ҳам танилган ён амиотрофик склероз қўл-оёқлар фалажлиги ва мускулларнинг қуриши билан кечади. Хасталик ўлимга олиб келиши мумкин, беморлар нафас йўллари инфекцияларидан ёки нафас олиш мускуллари ишламай қолишидан вафот этиши мумкин.
Ушбу акция кўплаб машҳур шахслар: йирик компаниялар эгалари, актёр ва актрисалар, қўшиқчилар, спортчилар, сиёсатчилар ва бошқаларни қамраб олди.
Украинада ҳам флешмобга қўшилишга қарор қилишди. Маблағни бемор болаларни қўллаб-қувватловчи «Таблеточки» лойиҳаси, аксилтеррорчилик операцияларида зарар кўрган ҳарбийлар ва бошқалар учун тўплашмоқда.
Изоҳ (0)