АҚШ президенти Барак Обама иштирокида 28 август куни Оқ уйда бўлиб ўтган брифингда ташқи сиёсатга доир Россия, Ироқ ва Сурия билан боғлиқ жиддий мавзулар муҳокама қилинди. Бироқ тадбирда қатнашганлар АҚШ раҳбарининг жаҳонда бўлаётган вазиятларга берган баҳосига эмас, у кийган оч жигарранг костюмга кўпроқ эътибор қаратди. Бу ҳақда «Сегодня» хабар бермоқда.
Барак Обама 2012 йилда Vanity Fair нашрига берган интервьюсида фақат қора ва кўк рангли костюм кийишини айтган эди. Интернет тармоғи фойдаланувчилари унинг ўз сўзига қарши чиқиб, оч жигарранг костюм кийишини ўринсиз деб топди.
Фойдаланувчилар қисқа муддат ичида Twitter’да #suitgate хештегидан фойдаланган ҳолда муҳокамани бошлаб юборди. Улардан бири Обаманинг сайловолди «Yes, we can!» («Ҳа, биз қила оламиз!») шиорини «Yes, we tan!» («Ҳа, биз қораямиз!»)га ўзгартирди. Яна бир шахс эса Twitter ижтимоий тармоғида Обама кийган костюм номидан @Obamasuit номли аккаунт ҳам очди. Бироқ тармоқ раҳбарияти тезда аккаунтни музлатиб қўйди.
Изоҳ (0)