Ҳиндистонлик аёл ўзига ҳамла қилган қоплонни белкурак билан уриб ўлдирди

Ҳиндистонлик аёл ўзига ташланган қоплонни у билан ярим соатлик жангдан сўнг қишлоқ хўжалик асбоблари ёрдамида ўлдирди, дея хабар бермоқда BBC.

Ҳиндистоннинг Уттаракханд штати фуқароси 56 ёшли Камла Девига яқиндаги дарахтлар орасидан чиқиб келган қоплон ҳамла қилганида у каналдан сув олаётган эди. Ўша вақтда аёлнинг қўл остида ўзини ҳимоя қилиш учун белкурак ва ўроқ бўлган. «Йиртқич билан курашаётган пайтимда тирик қолишимга умид ҳам қилмагандим, бироқ сабр-тоқат ва жасоратимни йўқотиб қўймадим», — деди у кейинроқ.

Қоплон билан ярим соатча жанг қилганидан кейин, аёл унинг жонсиз бўлиб қолганини сезган. Ҳодисадан сўнг Девини касалхонага элтишди, унинг аҳволи барқарор деб баҳоланмоқда. Бироқ шифокорлар унинг омон қолганидан ҳайратда. «Унинг ўнг қўли икки жойидан, чап қўли бир жойидан синган, бош ва оёқлари жиддий жароҳат олган, бутун танасида тиш излари бор», — деди аёлнинг шифокори Абдул Раҳул.

Сем Наути қишлоғи фуқаролари сўнгги пайтларда тез-тез қоплонлар ҳужумига учрамоқда, чунки улар йиртқичлар яшайдиган жойларга кириб бормоқда. Ўтган ҳафтанинг ўзидаёқ Уттаракхандда икки киши қоплонлар ҳужумидан ҳалок бўлган.