Forbes нашри таътилни ўтказиш учун собиқ Иттифоқдаги энг ғайриоддий жойлар рўйхатини эълон қилди. Ундан Ўзбекистон ҳам ўрин олди.
Мақола Ўзбекистонга ҳақиқий паловни татиб кўриш учун бориш кераклиги ҳақидаги жумла билан бошланди. Унинг бепоён пахта далалари ва минглаб йиллик тарихга эга шаҳарлар мамлакати эканлиги айтиб ўтилди.
«Бу ерда шаҳарлар қадимийлиги билан кишини ҳайратга солади: Ўрта асрлар давридан буён алоҳида бинолар эмас, бутун бошли кўчалар ва даҳалар сақланиб қолган, у ерда ҳалигача одамлар яшайди», — дея қайд этилади мақолада.
«Ўзбек миллий таомлари ичида энг анъанавий ва оммабопи» сифатида эса ош тилга олинди. Ошнинг юзлаб турлари борлиги, у Ўзбекистон шаҳарлари кўчаларида катта-катта дошқозонларда центнерлаб миқдорда дамланиши, ошнинг ўсмирлардан тортиб пенсионерларгача, оддий ишчилардан тортиб бизнесменларгача севиб истеъмол қилиши айтиб ўтилди.
«Паловнинг улкан дошқозонларда пиширилишини томоша қилишнинг ўзи учун ҳам Ўзбекистонга ташриф буюрса арзийди, — дейилади мақолада. — Таомнинг мазаси эса ҳеч кимни эътиборсиз қолдирмайди».
Шунингдек, нашр Самарқанд бозорлари, Бухоро тарихий ёдгорликлари, Хива егуликларига ҳам алоҳида тўхталиб ўтди.
Таъкидлаш жоиз, собиқ Иттифоқдаги дам олиш мумкин бўлган энг ноодатий манзиллар рўйхатига Латвия, Литва, Белоруссия, Украина, Молдова, Грузия, Арманистон, Озарбойжон, Қозоғистон, Туркманистон, Қирғизистон, Тожикистон ҳам киритилди.
Изоҳ (0)