Forbes: “Haqiqiy palovni tatib ko‘rish uchun O‘zbekistonga borish kerak”

Forbes nashri ta’tilni o‘tkazish uchun sobiq Ittifoqdagi eng g‘ayrioddiy joylar ro‘yxatini e’lon qildi. Undan O‘zbekiston ham o‘rin oldi.

Maqola O‘zbekistonga haqiqiy palovni tatib ko‘rish uchun borish kerakligi haqidagi jumla bilan boshlandi. Uning bepoyon paxta dalalari va minglab yillik tarixga ega shaharlar mamlakati ekanligi aytib o‘tildi.

“Bu yerda shaharlar qadimiyligi bilan kishini hayratga soladi: O‘rta asrlar davridan buyon alohida binolar emas, butun boshli ko‘chalar va dahalar saqlanib qolgan, u yerda haligacha odamlar yashaydi”, — deya qayd etiladi maqolada.

“O‘zbek milliy taomlari ichida eng an’anaviy va ommabopi” sifatida esa osh tilga olindi. Oshning yuzlab turlari borligi, u O‘zbekiston shaharlari ko‘chalarida katta-katta doshqozonlarda sentnerlab miqdorda damlanishi, oshning o‘smirlardan tortib pensionerlargacha, oddiy ishchilardan tortib biznesmenlargacha sevib iste’mol qilishi aytib o‘tildi.

“Palovning ulkan doshqozonlarda pishirilishini tomosha qilishning o‘zi uchun ham O‘zbekistonga tashrif buyursa arziydi, — deyiladi maqolada. — Taomning mazasi esa hech kimni e’tiborsiz qoldirmaydi”.

Shuningdek, nashr Samarqand bozorlari, Buxoro tarixiy yodgorliklari, Xiva yeguliklariga ham alohida to‘xtalib o‘tdi.

Ta’kidlash joiz, sobiq Ittifoqdagi dam olish mumkin bo‘lgan eng noodatiy manzillar ro‘yxatiga Latviya, Litva, Belorussiya, Ukraina, Moldova, Gruziya, Armaniston, Ozarboyjon, Qozog‘iston, Turkmaniston, Qirg‘iziston, Tojikiston ham kiritildi.