Барак Обама фаолиятини маъқуллаш рейтинги 40 фоизгача тушиб кетди, бу июнь ойидаги кўрсаткичдан 1 фоизга кам бўлиб, янги аксилрекорд ҳисобланади. Бу ҳақда The Wall Street Journal билан ҳамкорликда сўров ўтказган NBC News хабар берди.
Сўралганларнинг 57 фоизи Обама фаолиятидан мамнун эмаслигини, норозилик намойишига чиқишга тайёр эканини билдирди. Иштирокчилар томонидан айтилган талаблар орасида Обамага импичмент, чегараларни ёпиш, Украина ва Ғазо секторида одамларни бомбардимон қилишни тўхтатиш бор.
Президентнинг ташқи сиёсатини бор-йўғи 36 фоиз америкаликлар қўллаб-қувватлайди.
Сўров натижаларига кўра, 70 фоиз аҳоли мамлакат нотўғри йўналишда кетаётганини айтган бўлса, 80 фоизи Америка сиёсий тизими инқирозга юз тутганини таъкидлаган, сўралганларнинг 14 фоизигина АҚШ Конгресси фаолиятини маъқуллаган.
Ҳар ўн америкаликдан олти нафари мамлакат иқтисодиёти ҳолатидан норози, бу 2008 йилги жаҳон иқтисодий инқирозидан буён энг юқори кўрсаткичдир.
Изоҳ (0)