АҚШ давлат департаменти консуллик ишлари бюроси визалар тизимидаги муаммоларни ҳал этишда маълум муваффақиятга эришди. Бу ҳақда АҚШнинг Ўзбекистондаги элчихонаси маълумотига таяниб «Кун» хабар берди.
Хабар беришларича, жаҳон бўйлаб кечиктирилган АҚШ визаларнинг аксарияти ҳозирга қадар ўз эгаларига тақдим этилган. «Ҳозирда тизимни олдинги тўла қонли фаолият даражасига қайтариш устида иш олиб бормоқдамиз», – дейилади элчихона хабарида.
Маълум қилишларича, айни пайтда визалари маъқулланган мурожаат этувчилар ўз визалари тайёр бўлишини бир ҳафта кутишлари зарур.
Тизимда навбатдаги ўзгаришлар бўлгунга қадар, барча визалари маъқулланган мурожаат этувчилар ўз паспортларини виза билан суҳбат кунидан бир ҳафта ўтгач, соат 15:30 да олиб кетишлари мумкин бўлади.
«Сафар режаларини тузиш пайтида мазкур кутиш вақтини инобатга олишингизни сўраймиз», – дея қўшимча қилинади АҚШ элчихонаси эълонида.
Эслатиб ўтамиз, июль ойи охирида АҚШ давлат департаменти консуллик ишлари бюросининг паспорт ва визалар тизимида техник муаммолар кузатилгани сабаб, АҚШ виза беришни вақтинча тўхтатган эди.
Изоҳ (0)