Universal Mobile Systems (UMS) қўшма корхонасини тузиш ишлари бўйича янги тафсилотлар маълум бўлмоқда.
«РИА Новости» хабар беришича, уни тузиш ишлари 15 августгача, қўшма корхонани рўйхатга олиш ишлари эса 25 сентябрга қадар тугалланиши кутилмоқда.
Янги қўшма корхона қандай бренд остида фаолият олиб бориши ҳозирча номаълум.
Эслатиб ўтамиз, Ўзбекистон Вазирлар Маҳкамаси «Мобил алоқа хизматларини кўрсатиш бўйича Universal Mobile Systems қўшма корхонасини тузиш тўғрисида»ги қарорни қабул қилган. Қарорда белгиланишича, UMS 1 ноябрга қадар техник, 1 декабрга қадар тижорий эксплуатацияни амалга оширади.
Аввалроқ, «МТС» компанияси Ўзбекистон ҳукумати билан муроса битими имзолагани, Ўзбекистонда янги қўшма корхона ташкил этиши, корхонанинг 50,01 фоизи «МТС»га, 49,99 фоизи эса Ўзбекистон ҳукуматига тегишли бўлиши ҳақида хабар берган эди.
«МТС»нинг Ўзбекистондаги аввалги шўбаси – «Ўздунробита» компанияси амалда 2012 йил июлида фаолият кўрсатишни тўхтатган эди. Ўшанда алоқа соҳасидаги назорат қилувчи орган (Ўзбекистон Алоқа ва ахборотлаштириш агентлиги) томонидан компаниянинг лицензиялари чақириб олинган, кейинчалик Ўзбекистоннинг турли органлари томонидан умумий қиймати 600 миллион долларга тенг бўлган даъволар эълон қилинган эди.
Изоҳ (0)