2014 йилда Фарғонада 34 та янги балиқчилик хўжалиги ташкил этилди

Фарғона вилоятида 2014 йилнинг ўтган даврида 34 балиқчилик хўжалиги ташкил этилди. Бу йил вилоятда 3 минг тоннадан ортиқ балиқ етиштириш режалаштирилган, дея хабар берди ЎзА.

Мамлакатимизда яратилган шароит ва имкониятлардан унумли фойдаланаётган «Ўроқбой ота» фермер хўжалиги йилдан йилга ривожланиб бормоқда. Ўтган йили 4 гектар майдонда ташкил этилган ҳар хил ўлчамли садок усулидаги кўлларда дўнгпешона, карп, оқ амур каби балиқлар парваришланаётир. Хўжаликда 2,2 гектар майдонда сунъий ҳавза қуриш ишлари давом этмоқда.

– Балиқнинг хосияти кўп, – дейди «Ўроқбой ота» фермер хўжалиги раҳбари Алишер Мамажонов. – Мутахассисларнинг таъкидлашича, ҳафтасига бир марта балиқ истеъмол қилган одам юрагидан, кўзидан шикоят қилмайди. Қолаверса, балиқчилик – сердаромад соҳа. Хўжалигимизда бу борада катта тажриба тўпланган. Жорий йилда истеъмолчиларга 48 тонна парҳез маҳсулот етказиб беришни режалаштирганмиз.

Вилоятда мазкур соҳани ривожлантириш учун махсус дастур ишлаб чиқилган. Унда белгиланган чора-тадбирлар ижроси балиқчиликни ривожлантириш, энг муҳими, вилоят бозорларида ғоят фойдали ва парҳез маҳсулот – балиқнинг сероблигини таъминлайди.