Туркманистондаги мансабдорлар президент Гурбангули Бердимуҳамедовга мурожаат қилиб, Ашхободнинг энг чиройли бурчакларидан бирига унинг ҳайкалини ўрнатишни сўрашди. Бу ҳақда Туркманистон телевидениесига асосланиб, «Новый век» хабар берди.
Ашхободни ривожлантиришга бағишланган ҳукумат мажлисида бош вазир ўринбосари, Туркманистон Ташқи ишлар вазири Рашид Мередов пойтахтдаги кўркам ва кўзга кўринарли жойга давлат раҳбарининг ҳайкалини ўрнатишни таклиф қилди. У дунё жамоатчилиги тан олган, мамлакатда эришилган тараққиёт даражаси ва миллий иқтисодиётдаги муваффақиятлар Гурбангули Бердимуҳамедов номи билан боғлиқлигини таъкидлади.
Унинг сўровини Туркманистон Демократик партияси Марказий қўмитаси котиби Қосимгули Бобоев ҳам қўллаб-қувватлади.
Уларга жавобан, президент бу борада халқ билан маслаҳатлашиш ва халқ иродасига бўйсуниш кераклигини таъкидлади.
Туркманистон телевидениеси хабарида ҳайкал Ашхободнинг қайси қисмида ва қанча муддат ичида қурилиши ҳақида айтилмади.
Изоҳ (0)