Ўзбекистон Миллий авиакомпанияси учун иккита Boeing-787-800 Dreamliner самолётлари 2016 йил июнь ва августида етказиб берилиши кўзда тутилган. Бу ҳақда Вазирлар Маҳкамасининг 11 июлдаги қарорида айтилади, деб ёзади Gazeta.uz.
Ҳужжат орқали иккала «Орзу лайнерлари» ва захира двигателини сотиб олишни молиялаштириш (умумий нархи 246,4 миллион АҚШ доллари) ҳамда ушбу лойиҳа учун Ўзбекистон Тикланиш ва тараққиёт жамғармаси томонидан ажратилган кредитларни узиш (123,2 миллион доллар) графиклари тасдиқланди.
Тикланиш ва тараққиёт жамғармаси кредитлари «Ўзбекистон ҳаво йўллари» хусусий маблағлари томонидан ёпилади.
Сотиб олинаётган ҳаво кемалари нархининг 40 фоизини молиялаштириш учун хорижий банклар кредитларини жалб қилиш режалаштирилган.
Ҳужжатда қайд этилишича, миллий авиаташувчи Boeing компаниясига 3,86 миллион доллар миқдорида аванс тўловларини қисман амалга оширган.
Янги самолётлар «Ўзбекистон ҳаво йўллари» самолётлари паркини янгилаш лойиҳаси доирасида сотиб олинмоқда. 2012 йил ёзида Dreamliner Dream Tour жаҳон тақдимот тури доирасида Ўзбекистонга ҳам ташриф буюрган.
Эслатиб ўтамиз, Ўзбекистонда Марказий Осиёда ягона бўлган самолёт конструкциясининг таркибий қисмларини таъмирлаш бўйича марказ яратилади. Ушбу марказ Boeing-787 Dreamliner янги авлод авиация техникасига хизмат кўрсатиши кўзда тутилмоқда.
Изоҳ (0)