Facebook’даги «Potrebitel.uz» гуруҳи саҳифасида барчани адолат билан иш юритишга чорловчи хабар пайдо бўлди. Хабар муаллифи — Антон Ким Тошкентда фаолият юритувчи BM Store онлайн-дўкони эълон қилган танловда ғалаба қозонди. Бироқ танловнинг ғолиби 1 июль 18:00 га келиб ўзгариб қолган. Бу ҳақда iLike.uz блоги хабар берди.
Антон бу бир хато деган умидда BM Store маъмуриятига ўзининг ҳақлигини исботловчи скриншотларни жўнатди. Маъмурият билан бир неча бор баҳслашиб, барча далилларни жўнатишига қарамай, Антон Ким бу муаммони ҳал қилиш учун BM Store’нинг Дубайдаги маъмурияти билан боғланиши ҳақидаги таклифни олди.
Антон Ким хабарда BM Store танловларида иштирок этишдан фойда йўқлигини барча манбаларни кўрсатган ҳолда исботлаб берган. Хабар «Potrebitel.uz» гуруҳига жойлаштирилиши биланоқ унга мутахассислар, танлов қатнашчилари ва бошқа шахслар изоҳ берди. Маълум бўлишича, BM Store аввалги танлов ғолибларини ҳам тақдирламаган. Айрим изоҳлардан компания маъмуриятининг танловларда «таниш-билиш» сиёсатини юритиши «фош бўлди».
Шунга қарамай, BM Store саҳифасида «янги ғолиб» — Максим Гажиевни тақдирлаш маросимидан лавҳалар жойланди.
Расмни кўрган фойдаланувчилар танлов ноҳақ якунлангани, аслида Антон Ким ғолиб бўлгани ҳақидаги турлича изоҳларни қолдирмоқда.
Тошкент вақти билан 16:00да маълум бўлишича, ушбу шов-шувдан сўнг BM Store Facebook'даги 5000 дан ортиқ аъзоси бўлган ўз саҳифасини ўчириб ташлади. Саҳифага киришга уринганда BM Store саҳифаси ўрнига Facebook бош саҳифаси очилмоқда.
Изоҳ (0)