Дунёдаги энг йирик ижтимоий тармоқ бўлмиш Facebook фойдаланувчиларни огоҳлантирмасдан улар устида психологик эксперимент ўтказгани учун маломатларга қолди. Бу ҳақда «ИТАР-ТАСС» хабар берди.
2012 йилда бир ҳафта давомида 689 минг нафар тармоқ фойдаланувчилари янгиликлар тасмасига вақти-вақти билан гоҳ салбий хусусиятга эга хабарлар блоки, гоҳ фақат ижобий хабарлар чиқа бошлаган.
Олинган хабарларга боғлиқ равишда фойдаланувчилар кайфиятлари ўзгариб турган: ёмон янгиликни олганлар салбий хусусиятдаги статус ва изоҳлар ёза бошлаган, аксинча, яхши хабар ўқиганлар ажойиб кайфиятларини намойиш этган.
«Натижа шуни кўрсатдики, бошқа одамларнинг ҳиссиётлари фойдаланувчиларга катта таъсир ўтказади», — деди тадқиқотчилардан бири. Эксперимент устида тармоқ ходимлари, Корнелл ва Калифорния университетлари вакиллари ишлашди.
Кузатувлар тармоқ саҳифаларида олинган ҳиссиётлар интернетдан чиқиб кетгач ҳам фойдаланувчи ва унинг атрофидагиларга таъсир қилишда давом этишини кўрсатди.
Ушбу янгилик АҚШдаги илмий марказлар ва шахсий ҳаёт ҳимояси билан шуғулланувчи адвокатлар эътиборидан четда қолмади. Баъзи психологлар бундай тажрибани «та’қиб қилиш» деб атади.
Facebook эса ўз навбатида, тармоқ фойдаланувчиларнинг шахсий маълумотларига тегмаганлигини таъкидлади.
Юридик нуқтаи назардан Facebook ҳеч қандай қонунни бузгани йўқ. У ҳамма кўриши мумкин бўлган маълумотдан фойдаланган холос, деб ёзади «ИТАР-ТАСС».
Изоҳ (0)