Ўзбекистон ҳукумати маҳаллий уяли алоқа бозорида Россиянинг МТС компанияси бизнесини қайта ишга тушириш ҳақида қарор қабул қилди. Бу ҳақда Interfax ахборот агентлиги хабарига таяниб «Анҳор» нашри хабар берди.
Бундай қарор чоршанба куни қабул қилинган. Унга кўра Россия компанияси ўзбек томони билан МТС бренди остида ишлайдиган уяли алоқа шўба корхонасини тузади. Қўшма корхонанинг таъсис ҳужжатлари «яқин кунларда» имзоланади, дейилади Interfax хабарида.
МТСнинг Ўзбекистон бозорига қайтиши ҳақидаги бошқа тафсилотлар ҳозирча ошкор этилмаяпти. Бундан ташқари, МТС'нинг Ўзбекистонга қайтиши ҳақида на Ўзбекистон томони, на МТС расмий маълумот бермаган.
Аввалроқ Россиянинг МТС мобил алоқа оператори Ўзбекистон ҳукумати билан мамлакатдаги фаолиятини қайта йўлга қўйиш борасида деярли келишиб олгани, МТС маҳаллий компания – «Ўздунробита»даги ўз улушини Ўзбекистонга топшириши ҳам мумкинлиги ҳақида хабар тарқалган эди.
Эслатиб ўтамиз, 2012 йил июлида МТСнинг Ўзбекистондаги шўбаси – «Ўздунробита» операторининг лицензиялари чақириб олинган эди. Компанияга нисбатан қиймати 600 миллион доллардан ортиқ бўлган даъволар эълон қилинган, оператор раҳбариятига нисбатан эса жиноий иш очилган эди. Молиявий даъволарни тўлаш қобилияти йўқлиги сабаб, 2013 йил январида «Ўздунробита» банкрот бўлганини маълум қилган эди.
Изоҳ (0)