Уимблдон турнирининг иккинчи даврасида ҳамюртимиз Денис Истомин германиялик Юлиан Райстеран билан беллашди. Бу ҳақда Sports.uz хабар берди.
Икки соат-у ўн бир дақиқа давом этган баҳснинг биринчи сети шиддатли курашлар остида ўтди. Денис ўйин бошларида асосан ҳимояда ҳаракат қилди. Бунинг натижасида рақиби ўйинни тай-брекка қадар олиб борди. Тай-брекда Денис ажойиб ўйин кўрсатиб Юлианни мағлуб этди. Иккинчи ва учинчи сетларда мамлакатимизнинг биринчи ракеткаси ўйин тактикасини ўзгартирди. Денисдан бундай ўйинни кутмаган германиялик теннисчи ҳар иккала сетни 6:4 ҳисобида бой берди. Улар ўртасидаги ўзаро ўйинларда Денис 2:1 ҳисобида олдинда бормоқда.
Энди Денис Истомин мусобақанинг учинчи даврасида швейцариялик Станислас Вавринка билан беллашади. Улар шу кунга қадар уч маротаба тўқнаш келишган. Ушбу ўйинлардаги умумий ҳисоб 2:1 Станислас фойдасига. Стен ҳозирги кунда жаҳоннинг кучли теннисчилари қаторига киради. Бироқ Денис Истомин 2010 йилда «Катта дубулға» туркумига кирувчи мазкур мусобақада Станислас Вавринкани мағлубиятга учратган. Шу сабабли ҳам швейцариялик теннисчида ғолиб бўлиш имконияти юқори эмас.Ушбу мусобақада жаҳоннинг биринчи ракеткаси испаниялик Рафаэл Надал чехиялик Лукаш Росолни 4:6, 7:6, 6:4, 6:4 ҳисобида енгди.
Эслатиб ўтамиз, Ўзбекистоннинг биринчи рақамли теннисчиси илк даврада россиялик Дмитрий Турсуновга қарши кортга чиқиб, уни мағлубиятга учратган эди.
Изоҳ (0)