Uimbldon turnirining ikkinchi davrasida hamyurtimiz Denis Istomin germaniyalik Yulian Raysteran bilan bellashdi. Bu haqda Sports.uz xabar berdi.
Ikki soat-u o‘n bir daqiqa davom etgan bahsning birinchi seti shiddatli kurashlar ostida o‘tdi. Denis o‘yin boshlarida asosan himoyada harakat qildi. Buning natijasida raqibi o‘yinni tay-brekka qadar olib bordi. Tay-brekda Denis ajoyib o‘yin ko‘rsatib Yulianni mag‘lub etdi. Ikkinchi va uchinchi setlarda mamlakatimizning birinchi raketkasi o‘yin taktikasini o‘zgartirdi. Denisdan bunday o‘yinni kutmagan germaniyalik tennischi har ikkala setni 6:4 hisobida boy berdi. Ular o‘rtasidagi o‘zaro o‘yinlarda Denis 2:1 hisobida oldinda bormoqda.
Endi Denis Istomin musobaqaning uchinchi davrasida shveysariyalik Stanislas Vavrinka bilan bellashadi. Ular shu kunga qadar uch marotaba to‘qnash kelishgan. Ushbu o‘yinlardagi umumiy hisob 2:1 Stanislas foydasiga. Sten hozirgi kunda jahonning kuchli tennischilari qatoriga kiradi. Biroq Denis Istomin 2010-yilda “Katta dubulg‘a” turkumiga kiruvchi mazkur musobaqada Stanislas Vavrinkani mag‘lubiyatga uchratgan. Shu sababli ham shveysariyalik tennischida g‘olib bo‘lish imkoniyati yuqori emas.Ushbu musobaqada jahonning birinchi raketkasi ispaniyalik Rafael Nadal chexiyalik Lukash Rosolni 4:6, 7:6, 6:4, 6:4 hisobida yengdi.
Eslatib o‘tamiz, O‘zbekistonning birinchi raqamli tennischisi ilk davrada rossiyalik Dmitriy Tursunovga qarshi kortga chiqib, uni mag‘lubiyatga uchratgan edi.
Izoh (0)