«Учар кетмон» ўзбекистонлик iPhone эгалари энг кўп кўчириб олаётган ўйинга айланди

Flappy Bird ўйинига асосланган ва iOS қурилмалари учун мўлжалланган ўзбекча «Учар кетмон» ўйини ўзбекистонлик iPhone эгалари App Store’дан энг кўп юклаб олаётган дастурга айланди. Бу ҳақда «Кун» хабар берди.

App Annie маълумотларига кўра, тўлиқ номи «Учар кетмон (Flappy Bird’га дам)» бўлган ўйин App Store’да 20 июнь куни пайдо бўлиб, шу куннинг ўзида онлайн-дўконнинг Ўзбекистон майдончаси умумий рейтингида юклаб олишлар сони бўйича 214-ўринни, «Ўйинлар» категориясида эса 63-ўринни эгаллаган.

Дастур App Store’нинг Ўзбекистон умумий рейтингида 22 июнь куни 229-ўринга, 23 июнь куни эса бирданига 2-ўринга кўтарилган. Учар кетмон 24—25 июнь кунлари App Store’да биринчи бўлди, 26 июнь ҳолатига кўра дастур пешқадамликни ҳозирча ҳеч кимга бергани йўқ.

Ўйин машҳур Flappy Bird ўйини ҳамда ўзбек киноси хазинасига айланган комедия фильмларга асосланган бўлиб (жумладан, «Абдуллажон»), учар кетмон минган киши тўсиқлар орасига йиғилган сўмларни (5 минг сўмликлар) йиғиб чиқиши керак.

Фойдаланувчи бирор сўм йиғолмай, тўсиққа урилиб, ютқазса, «Абдуллажон» фильмидаги Бозорвой образининг «Ойтовоқ бўлмай ўл!» деган овози, агар кўп пул йиғса, «Миллионер бўпкетдим-а!» деган овози эшитилади. Ўйин давомида фильмлардан олинган бошқа иқтибосларни ҳам эшитиш мумкин.