Сурхондарё вилоятининг Термиз шаҳридаги Ўзбекистон—Жанубий Корея қўшма корхонаси қарийб уч миллион долларлик ип-калава экспорт қилди. Сурхондарё вилоятида Жанубий Корея сармояси иштирокида ташкил қилинган учта корхона фаолият юритмоқда, деб ёзади «Кун» ЎзА хабарига таяниб. Термиз шаҳридаги Shindong-Spinning-Termiz Ўзбекистон-Жанубий Корея қўшма корхонаси шулардан биридир.
Жанубий кореялик ишбилармонларнинг мазкур корхонага сармоя киритганига етти йил бўлди. Ўтган йили қўшма корхонада 5,592 миллиард сўмлик 1,28 минг тонна ип-калава ишлаб чиқарилиб, 2,809 миллион АҚШ доллари қийматидаги маҳсулот экспорт қилинди.
Бу ерда тайёрланаётган ип-калава маҳсулотлари асосан Хитой ва Россия каби мамлакатларнинг енгил саноат корхоналарига етказиб берилмоқда. Қўшма корхона иш бошлаган дастлабки йилларда бу ерда икки юзга яқин киши меҳнат қилган бўлса, айни пайтда 250 нафар ишчи ишламоқда. Уларнинг деярли барчаси касб-ҳунар коллежлари битирувчиларидир.
Ишчиларга бепул транспорт хизмати кўрсатиш, махсус кийим ва иссиқ овқат билан таъминлаш йўлга қўйилган. Ходимларни ижтимоий ҳимоя қилиш борасида амалга оширилаётган бундай ишлар қўшма корхонанинг бир маромда фаолият юритишини таъминлашга хизмат қилмоқда.
Бу йил корхонада 2 минг тоннага яқин ип-калава ишлаб чиқариш режалаштирилган. Ўтган беш ойда 400 тоннага яқин маҳсулот ишлаб чиқарилди. Тайёр ип-калавани харид қилиш учун хориж давлатларидаги енгил саноат корхоналари буюртма бермоқда.
Жорий йилда ҳам корхонада модернизация ишлари давом эттирилиб, хорижнинг янги тароқлаш ускунаси ўрнатилади. Бунинг учун 300 минг АҚШ доллари қийматидаги маблағ сарфланади. Натижасида ёшлар учун яна 50 иш ўрни яратилади, шунингдек, маҳсулот сифати ошиб, электр энергияси сарфида тежамкорликка эришилади.
Изоҳ (0)