Termizdagi O‘zbekiston—Janubiy Koreya qo‘shma korxonasi uch mln dollarlik ip-kalava eksport qildi
Surxondaryo viloyatining Termiz shahridagi O‘zbekiston—Janubiy Koreya qo‘shma korxonasi qariyb uch million dollarlik ip-kalava eksport qildi. Surxondaryo viloyatida Janubiy Koreya sarmoyasi ishtirokida tashkil qilingan uchta korxona faoliyat yuritmoqda, deb yozadi “Kun” O‘zA xabariga tayanib. Termiz shahridagi Shindong-Spinning-Termiz O‘zbekiston-Janubiy Koreya qo‘shma korxonasi shulardan biridir.
Janubiy koreyalik ishbilarmonlarning mazkur korxonaga sarmoya kiritganiga yetti yil bo‘ldi. O‘tgan yili qo‘shma korxonada 5,592 milliard so‘mlik 1,28 ming tonna ip-kalava ishlab chiqarilib, 2,809 million AQSh dollari qiymatidagi mahsulot eksport qilindi.
Bu yerda tayyorlanayotgan ip-kalava mahsulotlari asosan Xitoy va Rossiya kabi mamlakatlarning yengil sanoat korxonalariga yetkazib berilmoqda. Qo‘shma korxona ish boshlagan dastlabki yillarda bu yerda ikki yuzga yaqin kishi mehnat qilgan bo‘lsa, ayni paytda 250 nafar ishchi ishlamoqda. Ularning deyarli barchasi kasb-hunar kollejlari bitiruvchilaridir.
Ishchilarga bepul transport xizmati ko‘rsatish, maxsus kiyim va issiq ovqat bilan ta’minlash yo‘lga qo‘yilgan. Xodimlarni ijtimoiy himoya qilish borasida amalga oshirilayotgan bunday ishlar qo‘shma korxonaning bir maromda faoliyat yuritishini ta’minlashga xizmat qilmoqda.
Bu yil korxonada 2 ming tonnaga yaqin ip-kalava ishlab chiqarish rejalashtirilgan. O‘tgan besh oyda 400 tonnaga yaqin mahsulot ishlab chiqarildi. Tayyor ip-kalavani xarid qilish uchun xorij davlatlaridagi yengil sanoat korxonalari buyurtma bermoqda.
Joriy yilda ham korxonada modernizatsiya ishlari davom ettirilib, xorijning yangi taroqlash uskunasi o‘rnatiladi. Buning uchun 300 ming AQSh dollari qiymatidagi mablag‘ sarflanadi. Natijasida yoshlar uchun yana 50 ish o‘rni yaratiladi, shuningdek, mahsulot sifati oshib, elektr energiyasi sarfida tejamkorlikka erishiladi.
