«SOS — Ўзбекистон болалар маҳаллалари» уюшмаси Хоразм вилояти филиалида «Ижтимоий заиф оилалар учун мустаҳкам ижтимоий тармоқ ўрнатиш» лойиҳаси доирасида оилавий маслаҳат маркази иш бошлади. Бу ҳақда «Туркистон пресс» хабар берди.
«SOS — Ўзбекистон болалар маҳаллалари» уюшмаси, Хоразм вилояти ҳокимлиги ва Ўзбекистон Касаба уюшмалари федерацияси ҳамкорлигида ташкил этилган оилавий маслаҳат маркази ижтимоий заиф оилаларга маънавий, психологик ва юридик хизмат кўрсатади. Фуқароларнинг ишга жойлашиши ва шахсий бизнесини йўлга қўйишида ёрдам беради. Бу ерда кўнгиллилар учун «Ота-оналар клуби» фаолияти ҳам йўлга қўйилган.
— Юртимизда ҳар бир бола меҳр ва эътиборда, — дейди марказ раҳбари Инобат Шомуратова. — Марказимизда ота-оналарга уларнинг эҳтиёжларидан келиб чиққан ҳолда фарзанд тарбияси бўйича зарур маслаҳатлар бериш, ота-оналик кўникмасини ошириш ҳақида тренинглар ўтказиш режалаштирилмоқда. Бу эса келгусида оилалар тинч-тотувлигини таъминлашга хизмат қилади.
Ҳозирги кунда Урганч шаҳри ва Шовот туманидаги «SOS— болалар маҳаллалари»да тарбияланаётган болажонлар учун барча шароитлар яратилган. Ташкилот ходимлари, педагог ва психологлардан иборат оилаларни қўллаб-қувватлаш гуруҳи нафақат «SOS»оилалари, балки қишлоқ ва маҳаллалардаги ижтимоий заиф оилаларга ҳам ҳар томонлама кўмак бермоқда.
Изоҳ (0)