Қозоғистон президенти Нурсултон Назарбоевнинг собиқ куёви Роҳат Алиев 5 июнь куни Венада қўлга олинди, у қотиллик ва одам ўғирлашда айбланмоқда. Бу ҳақда Агенcе France Presse хабар берди.
Роҳат Алиевни ҳибсга олиш ҳақидаги буйруқ Австрия ҳукумати томонидан 19 май куни чиқарилган. Қозоғистон раҳбарининг собиқ куёви вакили Манфред Айнедтер таъкидлашича, унинг ҳимояси остида бўлган Алиев ҳуқуқни муҳофаза қилувчи органларга ўз ихтиёри билан таслим бўлган. У тергов ишларида қўлидан келганча ёрдам бермоқчи.
Роҳат Алиев Қозоғистон президентининг тўнғич қизига уйланган эди. У бизнес билан шуғулланган ва Миллий хавфсизлик қўмитасида ишлаган. Кейинчалик Қозоғистоннинг Австриядаги элчиси этиб тайинланган.
2007 йилда Қозоғистонда Алиев икки нафар банк ходимини ўғирлаб кетганликда айбланди (тўрт йилдан сўнг уларнинг жасадлари топилган), унга нисбатан жиноий иш қўзғатилди ва 20 йиллик қамоқ жазосига сиртдан ҳукм қилинди (унгача президентнинг қизи билан ажрашиб бўлган). Бироқ у жазодан қочиб, Австрияга кўчиб ўтди. Кейинроқ Алиевга сиртдан яна бир ҳукм чиқарилди: у давлат тўнтаришини амалга оширишга уринишда айбланди ва яна 20 йиллик қамоққа ҳукм қилишди.
Вена унга нисбатан адолатли ҳукм чиқарилмаслигидан хавфсираб, Алиевни Қозоғистонга қайтариб беришдан икки марта бош тортди. 2011 йил июлида Австрия юстицияси Алиевга нисбатан ўз терговларини бошлади. Бунгача у Малтага қочиб қолган эди.
Алиев айбловларнинг барчасини рад этиб, ўзининг сиёсий та’қиблар қурбонига айланганини таъкидлаган.
Изоҳ (0)