Тошкент ҳокими Раҳмонбек Усмоновнинг 28 майдаги қарорига кўра пойтахт деҳқон бозорларидаги тез бузиладиган озиқ-овқат маҳсулотлари савдосини тартибга солиш бўйича қатор чоралар тасдиқланди. Бу ҳақда Gazeta.uz хабар берди.
Ҳужжат «Тошбозорсавдо» уюшмасига деҳқон бозорлари ва уларнинг филиаллари ҳудудида гўшт, сут, тухум, салат ва кондитер маҳсулотлари савдо расталарига витринали совитгичлар ўрнатиш юклатилди.
Бозорларда ҳафтанинг бир куни Тозалик куни сифатида белгиланади. Шу куни бозорлар ва уларнинг филиаллари ҳудудида жойлашган барча объектларда тозалаш ва дизинфексиялаш тадбилари ўтказилади.
Савдо расталари оралиқларига махсус ахлат идишлари ўрнатилади, чиқинди йиғиш майдонлари тартибга келтирилади, чиқинди ҳар куни чиқариб кетилади.
Тегишли идораларга ИИББ Жамоатчилик тартибини сақлаш бошқармаси билан ҳамкорликда бозордаги тадбиркорлар ва ишчиларнинг ўз вақтида тиббий кўрикдан ўтиши, уларнинг махсус иш кийими билан таъминланиши, маҳсулотларнинг сақланиш ва сотилиш қоидаларига риоя қилиниши, иш жойларининг санитар ҳолатда бўлиши устидан назорат ўрнатиш топширилди.
Сифати кафолатланмаган озиқ-овқат маҳсулотларини аҳолига сотишнинг олдини олиш бўйича қатъий чоралар кўриш таъкидланди.
1 октябрга қадар бозорларда калла-поча ва ичак-човоқлар билан савдо қилиш тақиқланди (витринали совитгичлар ўрнатилган мажмуаларда рухсат этилади).
Қорамол оёқ-қўллари ва ички аъзолари бозор ҳудудига тозланган ҳолда келтирилиши лозим.
Изоҳ (0)