Урганч давлат университети Физика-математика факультетининг «Математик таҳлил» мутахассислигида таҳсил олаётган Нурбек Хўжатов табиий фанлар мутахассисликлари бўйича (магистратура йўналиши) Ўзбекистон Республикаси Президенти давлат стипендиясига сазовор бўлди. У айни пайтда «Биомеханик жараёнларни математик моделлаштириш» мавзусида илмий изланишлар олиб бормоқда, деб ёзади «Туркистон пресс».
«Биомеханик жараёнларни математик моделлаштириш» мавзусида илмий изланиш олиб бораётган ёш олимнинг тадқиқот натижалари жам бўлган 20 дан ортиқ илмий мақолалари журнал ва илмий тўпламларда чоп этилди. Унинг назарий қарашлари кўплаб етакчи олимлар диққат-эътиборига тушди.
— Нурбек жуда тиришқоқ ва интилувчан, — дейди физика-математика фанлари доктори, профессор Қуролбой Наврўзов. — Унинг илмий тадқиқот ишида юрак ва вена қон томирларининг ишлаш механизми биомеханик нуқтаи назардан таҳлил этилган. Юракнинг чап қоринчаси кесик айланма эллипсоид шаклга эгалиги, қонни ҳаракатга келтиришдаги энг оптимал даражадалиги исботланган ва унинг математик модели яратилган. Шогирдимнинг илмий изланишларида биринчи бўлиб юрак ва вена қон томирлари ҳаракати, унинг реалликка яқин бўлган математик ҳолати моделлаштирилган.
Айни вақтда Нурбек Хўжатов Республика ихтисослаштирилган кардиология маркази функсионал ташхислаш бўлими мудири, тиббиёт фанлари номзоди Регина Бекбулатова ҳамда марказнинг Хоразм вилояти филиали ходимлари билан ҳамкорликда тадқиқотини давом эттирмоқда. Бу йўналиш бўйича 2012—2016 йиллар давомида бажарилиши мўлжалланган «Юрак биомеханикаси ва унинг татбиқлари» мавзусидаги фундаментал илмий изланиши учун 150 миллион сўм миқдорида давлат гранти ажратилган.
Изоҳ (0)