Туркия конституциявий суди YouTube’нинг ёпиб қўйилганини ноқонуний деб эълон қилди. Бу ҳақда Anadolu агентлиги хабар берди. Судда айтилишича, видеохостингга ташрифни чеклаш фуқароларнинг ўз фикрини ифода этиш ҳуқуқини бузади.
YouTube’ни мамлакатда блоклаб қўйишга бош вазир Ражаб Таййиб Эрдўғон ташаббускорлик қилган. YouTube раҳбарияти эса Конституциявий судда мазкур чеклов бўйича тортишишишга қарор қилди.
Туркия ҳукумати 27 март куни YouTube видеохостингига киришни блоклаб қўйди. Бир неча кундан кейин Анқарадаги суд интернетнинг маҳаллий сегментидан оммабоп YouTube видеосервисига тўғридан-тўғри киришни блоклаш тўғрисида қарор қабул қилди. Шу йўл билан Туркия Телекоммуникациялар ва алоқа бошқармасининг YouTube’га киришни блоклаш тўғрисидаги қарори узил-кесил қонунийлаштирилди.
Суднинг бундай қарор чиқаришига сабаб – YouTube раҳбарияти видеосервисдан Туркия Ташқи ишлар вазирлиги биносида март ойининг бошида бўлиб ўтган махфий йиғилишдан олинган ёзувни ўчириб ташламаганлигидир. Йиғилишда ҳукумат аъзолари ва қуролли кучлар вакиллари Суриядаги вазият юзасидан суҳбат олиб борганлар.
Изоҳ (0)