АҚШнинг Мичиган штати Университети олимлари гўнгдан тоза сув олиш технологиясини ишлаб чиқишди. Уларнинг айтишича, ушбу ихтиро сайёрамизнинг қурғоқчил ҳудудларида айниқса талабгир бўлиши кутилмоқда. Бу ҳақда «ИТАР-ТАСС» хабар берди.
«Биоген моддаларни ажратиш тизими» деб номланган қурилма устида бундан ўн йилча аввал иш бошланган. Унинг асосида қишлоқ хўжалиги чиқиндиларини органик ўғитларга айлантириш ва энергия олишда ишлатиладиган анаэроб ачитиш ускунаси мавжуд. Бундан ташқари, унга ултрафилтрлаш ва ҳаво орқали ҳайдаш ҳамда тескари осмос мосламалари ўрнатилган. Гўнгнинг ушбу қурилмадан ўтиши натижасида тоза сув ҳосил бўлади, уни чорва молларига ичириш мумкин бўлади.
Технология муаллифларидан бири Стив Сафферман сўзларига кўра, гўнгнинг 90 фоизини сув ташкил қилади. Шу билан бирга, унинг таркибида атроф-муҳитга зарарли бўлган катта миқдордаги биоген моддалар, углерод ва касаллик қўзғатувчилар бор. Янги қурилма ушбу моддаларни ажратиб олади, улар кейинчалик ўғит ишлаб чиқаришда қўлланилиши мумкин.
Янги тизим 1 куб метр гўнгдан 0,5 куб метр сув олиш имконини беради. Келажакда ушбу кўрсаткични ошириш режалаштирилмоқда.
Изоҳ (0)