Абхазия президенти Александр Анкваб ўзининг истеъфосини талаб қилаётган маҳаллий мухолифатга нисбатан куч қўллашдан бош тортди. Бу ҳақда республика Хавфсизлик кенгаши котиби Нугзар Ашуба маълум қилди.
Котибнинг сўзларига кўра, президент «барча тузилмалардан муаммони куч билан ҳал қилиш вариантларини мутлақо истисно қилишни талаб қилган».
Анкваб ўз интервьюларидан бирида мухолифат билан музокараларга киришишга тайёрлигини, бироқ уларнинг ултиматумларини бажариш ниятида эмаслигини билдирган.
Аввалроқ ОАВлар Абхазия пойтахтида «майдон» бошланганидан сўнг Анкваб Гудаута яқинидаги Россия ҳарбий базасига келгани ва ҳалигача шу ерда экани ҳақида хабар тарқатган эди.
Ўз навбатида, президент маъмурияти ва телевидение биносини эгаллаб олган мухолифат «халқ ишончи муваққат кенгаши» тузилганини эълон қилди. Унга президентликка собиқ номзод Раул Хажимба раҳбарлик қилди. «Муваққат кенгаш» Абхазияда ижро этувчи ҳукуматга айланишга даъвогарлик қилмоқда.
Изоҳ (0)