Британия ҳукумати мамлакат собиқ бош вазири Тони Блэр ва АҚШ собиқ президенти кичик Жорж Буш ўртасида 2003 йилда бўлиб ўтган ёзишмаларни фош қилишга қарор қилди. Ушбу ёзишмалар 2003 йил Ироққа қилинган ҳужумдан бир неча ой аввал олиб борилган, дея хабар берди «ИТАР-ТАСС».
Бунда гап 25 та хат ва 130 дан ошиқ телефон суҳбатлари ҳақида бормоқда. 2011 йилда Британия вазирлар маҳкамаси котиби Гас О’Доннел бундай қадам «Бирлашган Қиролликнинг халқаро муносабатларига зарар етказиши»ни таъкидлаб, ҳужжатларни ошкор қилишдан бош тортган эди.
2009 йилда Британия қўшинларининг Ироққа киритилиши ҳолатини ўрганиш учун тузилган махсус парламент комиссияси аъзолари хабарлар ва мактубларни қўлга киритди. Ҳужжатларнинг қачон жамоатчиликка эълон қилиниши ҳозирча номаълум.
Ғарбий коалициянинг Ироққа ҳужумидан сўнг Саддам Ҳусайн режими оммавий қирғин қуролига эга эмаслиги аниқланган, урушнинг асосий мақсади эса шу қуролни йўқ қилишдан иборат бўлган. Кейинроқ Британия ОАВларида Блэр ва Буш аслида нефт конларини қўлга киритиш мақсадида жамоатчиликни чалғитгани ҳақида фикрлар пайдо бўлган.
Изоҳ (0)