Американинг CNN телеканали ўзининг iReport порталига жойланган, 2041 йил мартида Ерга баҳайбат астероид келиб урилиши ҳақидаги мақолани ўчириб ташлади. У Marcus 575 ники остидаги фойдаланувчи томонидан эълон қилинган бўлиб, бир сутка ичида 250 минг марта ўқилган. Бу ҳақда «РИА Новости» хабар берди.
Мақолада айтилишича, Манхеттен (АҚШнинг Нью-Йорк шаҳридаги округ) катталигидаги астероид сайёрамизга катта тезликда яқинлашиб келмоқда. Бугунги кунда осмон жисми Ердан 51 миллион километр масофада жойлашган. Муаллиф қолган тафсилотлардан хабар топиши билан уларни эълон қилишга ваъда берган.
Кейинроқ хабар порталдан ўчирилди, унинг ўрнига NASA ушбу маълумотни рад этгани ҳақида CNN баёноти пайдо бўлди.
CNN таъкидлашича, iReport телеканал ва унинг сайти аудиторияси учун мўлжалланган ўзига хос ижтимоий тармоқ кўринишидаги манбадир. У ерда янгиликларга қизиқадиган фойдаланувчилар «уларни бутун дунё билан бўлишади». Фойдаланувчилар жойлаган материаллар эса таҳрирланмайди.
Изоҳ (0)