Ўзбекистон Миллий матбуот марказида Тошкент шаҳрида янги иш ўринлари яратиш, касб-ҳунар коллежлари битирувчилари ва меҳнат билан банд бўлмаган аҳолини иш билан таъминлаш масалаларига бағишланган матбуот анжумани ўтказилди.
2014 йилда пойтахтда 91 мингга яқин иш ўрни яратилиши кўзда тутилган. Улар асосан янги ишлаб чиқариш объектларини ишга тушириш, мавжуд корхоналарни кенгайтириш ва қувватларни янгилаш, кичик корхоналар ва микрофирмаларни ташкил этиш, якка тартибдаги тадбиркорлик, уй меҳнатининг барча шакллари, ишлаб чиқариш, ижтимоий ва бозор инфратузилмасини ривожлантириш, ишламай турган корхоналар фаолиятини тиклаш ҳисобига барпо этилади.
Жорий йилнинг май ойига қадар шаҳарда қарийб 30 мингга яқин иш ўрни ташкил этилган бўлиб, уларнинг 17 минг 200 дан зиёди хотин-қизлар учун мўлжалланган. Туманлардаги бандликка кўмаклашиш ва аҳолини ижтимоий муҳофаза қилиш марказлари орқали 19 минг нафарга яқин банд бўлмаган аҳоли ишга жойлаштирилди. Яратилаётган иш ўринларининг қарийб 75 фоизи кичик бизнес ва хусусий тадбиркорликни ривожлантириш ҳисобига тўғри келмоқда.
Анжуманда таъкидланганидек, аҳоли, айниқса, ёшларнинг бандлигини таъминлашда маҳалла фуқаролар йиғинлари ва бошқа жамоат ташкилотлари ўртасидаги ижтимоий ҳамкорлик яхши самара бермоқда. Хусусан, жорий йилнинг ўтган даврида маҳалла фуқаролар йиғинлари томонидан 18 мингдан ортиқ вақтинча ишсиз фуқаро аниқланиб, уларнинг 11 минг 728 нафари ишга жойлаштирилди. Корхона ва ташкилотлардаги мавжуд бўш иш ўринлари тўғрисидаги маълумотлар Меҳнат ва аҳолини ижтимоий муҳофаза қилиш вазирлиги, Тошкент шаҳар ҳокимлигининг расмий веб-сайтларида доимий жойлаштириб борилмоқда. Шу билан бирга, ҳар бир маҳаллада жорий этилган «Меҳнат бурчаклари»да банд бўлмаган аҳоли учун бўш иш ўринлари тўғрисидаги маълумотлар тақдим этилмоқда.
Айни кунда пойтахтимизда 41 академик лицей, 79 касб-ҳунар коллежи фаолият кўрсатаётир. Жорий йилда мавжуд коллежларни 35 минг 550 нафар ёш тамомлайди. Уларнинг 90 фоиздан ортиғи билан уч тарафлама шартномалар тузилган. Корхона ва ташкилотлар томонидан ушбу шартномалар асосида ёшларни иш билан таъминлаш бўйича комплекс чора-тадбирлар амалга оширилмоқда. Доимий тарзда ўтказилаётган «Таълим ва мутахассислик» кўргазмаси, меҳнат ярмаркалари ёшларнинг бандлигини таъминлашда алоҳида аҳамият касб этмоқда.
Изоҳ (0)