Ўзбекистон Республикаси Бош прокуратураси ҳузуридаги Солиқ, валютага оид жиноятларга ва жиноий даромадларни легаллаштиришга қарши курашиш (СВОЖЖДЛҚК) департаментининг Олтиариқ туман бўлими ходимлари томонидан «Қишлоқхўжаликкимё» ҳудудий аксиядорлик жамияти Олтиариқ туман шўба корхонаси томонидан фермер хўжаликларига минерал ўғитлар етказиб берилиши ва бошқа хизматлар кўрсатилиши натижасида юзага келган қарздорликнинг асослилиги ўрганилди. Натижада корхона мансабдор шахслари корхонага кирим қилинган умумий қиймати 5 миллион 592 минг сўмлик 1790 литр ёнилғи маҳсулотларини талон-тарож қилгани аниқланди. Бу ҳақда «Ҳуқуқ» газетаси хабар берди.
СВОЖЖДЛҚК департаментининг Олтиариқ туман бўлими бошлиғи Бекзод Дадажоновнинг таъкидлашича, корхона мансабдор шахслари юзага келган камомадни яшириш мақсадида тумандаги 5 та фермер хўжалик раҳбарларининг ишончига кирган. Уларни алдаш йўли билан тўлдирилмаган ҳолатдаги йўл варақаларига имзо ва фермер хўжалик муҳрини қўйдиришга эришиб, кейинчалик ушбу бланкаларга фермер хўжаликларига техник хизмат кўрсатилгани ҳақидаги сохта ёзувларни киритган ва улардан бухгалтерия ҳисоботларини тайёрлашда фойдаланган.
Оқибатда фермер хўжаликларига асоссиз равишда 30 миллион 786 минг сўмлик тўловларни ҳисоблаб, 2 та фермер хўжалигининг 15 миллион 16 минг сўм миқдоридаги тўловларини уларнинг корхона олдидаги дебитор ҳақдорликлари ҳисобига ундириб, фермер хўжаликларининг пул маблағларини талон-тарож қилган. Қолган 3 та фермер хўжалигининг эса корхона олдидаги муддати ўтган кредитор қарздорликларининг асоссиз равишда 15 миллион 770 минг сўмга ортишига сабабчи бўлган.
Юқоридаги ҳолатлар бўйича «Қишлоқхўжаликкимё» ҲАЖ Олтиариқ туман шўба корхонаси мансабдор шахсларига нисбатан Жиноят кодексининг тегишли моддалари билан жиноят иши қўзғатилиб, суд томонидан жазо чоралари қўлланилди, — дейилади хабарда.
Изоҳ (0)