O‘zbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish (SVOJJDLQK) departamentining Oltiariq tuman bo‘limi xodimlari tomonidan “Qishloqxo‘jalikkimyo” hududiy aksiyadorlik jamiyati Oltiariq tuman sho‘ba korxonasi tomonidan fermer xo‘jaliklariga mineral o‘g‘itlar yetkazib berilishi va boshqa xizmatlar ko‘rsatilishi natijasida yuzaga kelgan qarzdorlikning asosliligi o‘rganildi. Natijada korxona mansabdor shaxslari korxonaga kirim qilingan umumiy qiymati 5 million 592 ming so‘mlik 1790 litr yonilg‘i mahsulotlarini talon-taroj qilgani aniqlandi. Bu haqda “Huquq” gazetasi xabar berdi.
Oqibatda fermer xo‘jaliklariga asossiz ravishda 30 million 786 ming so‘mlik to‘lovlarni hisoblab, 2 ta fermer xo‘jaligining 15 million 16 ming so‘m miqdoridagi to‘lovlarini ularning korxona oldidagi debitor haqdorliklari hisobiga undirib, fermer xo‘jaliklarining pul mablag‘larini talon-taroj qilgan. Qolgan 3 ta fermer xo‘jaligining esa korxona oldidagi muddati o‘tgan kreditor qarzdorliklarining asossiz ravishda 15 million 770 ming so‘mga ortishiga sababchi bo‘lgan.
Yuqoridagi holatlar bo‘yicha “Qishloqxo‘jalikkimyo” HAJ Oltiariq tuman sho‘ba korxonasi mansabdor shaxslariga nisbatan Jinoyat kodeksining tegishli moddalari bilan jinoyat ishi qo‘zg‘atilib, sud tomonidan jazo choralari qo‘llanildi, — deyiladi xabarda.
Izoh (0)