Samarqand viloyati Respublikada aholi soni bo‘yicha eng oldi qatorda turadi. Ko‘hna shaharda futbolga qiziqish ham boshqa joylardan kam emas.
O‘zining boy tarixi va sodiq muxlislari bilan tanilgan “Dinamo” klubi uzoq vaqtdan beri shahar uchun g‘urur ramzi bo‘lib kelgan. Afsuski, hozirgi paytda klub katta muammolarga duch kelmoqda.
“Paxtakor” stadionida bo‘lib o‘tgan Superliganing 7-turida “Surxon”ga qarshi maydonga tushgan futbolchilar durangga imzo chekdi.
O‘yindan so‘ng bosh murabbiy Vadim Abramov “Daryo.uz”ga eksklyuziv intervyu berib, “Dinamo”dagi og‘ir vaziyatga oydinlik kiritdi.
Murabbiyning taʼkidlashicha, oxirgi 3,5 oy davomida “Dinamo” futbolchilari va murabbiylari o‘z maoshlarini ololgani yo‘q. Murabbiyga to‘lov muddati haqida so‘ralganda, vaziyat bo‘yicha aniq javob berilmaganini aytdi.
Diyor Imomxo‘jayev klub xususiylashtirgani haqida taʼkidlagan edi. “Dinamo” klubi bosh homiy Agromir buildings tomonidan moliyalashtirilishi kerak. O‘rinli savol tug‘iladi — oyliklarni kim to‘lashi kerak: Samarqand viloyati hokimligimi yoki Agromir buildings tashkilotimi?
Bosh murabbiy ham oylik maoshlari kim tomonidan berilishi kerakligi haqidagi savolga javobni ochiq qoldirdi.
Bundan tashqari, klub “Dinamo” stadioni taʼmirlanayotgani sabab qo‘shni Jizzax viloyatida uy o‘yinlarini o‘tkazmoqda. Futbolchilar va murabbiylar ham o‘sha yerda yashab, mashg‘ulotlarda qatnashmoqda. Mehmonxona xarajatlari hamda sharoitlar haqida so‘ralgan savolga Vadim Abramov hozircha hammasi joyida ekanligi, lekin keyin nima bo‘lishini bilmasligini aytib o‘tdi.
Tasavvur qiling, sal kam 4 oydan beri oyliklarni to‘lamayotgan hokimiyat yoki Agromir buildings kompaniyasi mehmonxona xarajatlarini to‘lashni ham to‘xtatsa, keyin qanday holat yuz beradi!?
O‘zPFL Samarqanddagi maydonlarning hech birini musobaqalarni o‘tkazishga loyiq ko‘rmagani bois, Samarqand klubi “So‘g‘diyona” maydonini o‘yinlar uchun tanlagan. “Tribuna” nashri bergan maʼlumotlarga tayansak, maydonning drenaj tizimi yangilangan, chim tayyor holatda, ammo quruvchilar bilan to‘lov borasidagi muammolar sabab qolgan ishlarni bajarilishi to‘xtab qolgan. Maydon ta’miriga kim javobgarligi haqidagi savol ham javobsiz qolmoqda.
Ushbu muammoli vaziyatda Professional futbol ligasining o‘rni haqida savollar tug‘iladi: Ular “Dinamo”ning ahvolidan xabardormi, agar bilsa, vaziyatni yumshatish uchun qanday choralar ko‘rilmoqda? Qolaversa, “Dinamo” xususiy klub bo‘lsa, PFL o‘z majburiyatlarini bajarish uchun xususiy tashkilotga bosim o‘tkazish huquqiga egami?
Hozir “Dinamo” klubi futbolchilari Superligadagi o‘rni, o‘yindagi barqarorlik va g‘alabalar haqida o‘ylashi kerak. Buning o‘rniga esa jamoa to‘lanmagan oyliklar, o‘z uy maydoniga qaytish va mavhum kelajak haqida fikr yuritishi talab etiladi.
Jamoaning hozirda jon-jahdi bilan o‘ynayotganiga sabab murabbiyning qo‘llovi hamda hech qachon o‘z futbolchilarini yolg‘iz qo‘ymayotgan muxlislar hisoblanadi.
Jamoani qo‘llab-quvvatlovchilar o‘zlarining sevimli jamoasi tezroq muammolardan holi bo‘lib, o‘z shahrida o‘ynashini xohlaydi. Musobaqalarni tashkil etish vakolatini olgan PFL unda ishtirok etuvchi jamoalarning huquqlarini ham himoyachisi hisoblanadi. Tez orada tashkilotdan harakat kutib qolamiz.
Erkin G‘aybullayev
Izoh (0)