Тошкент шаҳар маҳаллий бюджетининг жорий йилнинг III чорак якунлари бўйича ёғингарчиликлар даврида сув тошқинлари билан боғлиқ ҳолатларнинг олдини олиш юзасидан қурилиш-таъмирлаш ишларини амалга ошириш учун 6 миллиард сўм миқдорида маблағ ажратди. Бу ҳақда “Э-қарор”да эълон қилинди.
Пойтахт ҳокими қарорида айтилишича, Тошкент шаҳар маҳаллий бюджетининг 2024 йил давомида шаклланган қўшимча манбалари ҳисобидан ёғингарчиликлар даврида сув тошқинлари билан боғлиқ ҳолатларнинг олдини олиш юзасидан қурилиш-таъмирлаш ишларини амалга ошириш учун 20 миллиард 400 юз миллион сўм маблағ ажратилган.
Тошкент шаҳар маҳаллий бюджетининг 2024 йил III чорак якунлари бўйича орттириб бажарилган қисми ҳисобидан ёғингарчиликлар даврида сув тошқинлари билан боғлиқ ҳолатларнинг олдини олиш юзасидан қурилиш-таъмирлаш ишларини амалга ошириш учун 6 миллиард сўм миқдорида маблағ тақсимлансин, дейилади қарорда.
Маблағ “Ягона буюртмачи хизмати” инжиниринг компаниясига ўтказиб бериш кўзда тутилган.
Аввалроқ президент Шавкат Мирзиёев пойтахтнинг дренаж тизими ишига қатъий эътироз билдириб, кучли ёмғир ҳақиқий аҳволни кўрсатганини қайд этган эди.
Дренажни тўғрилашнинг ўзи етарли эмаслиги, сувни ҳавзаларда тўплаш тизимини қилиб, дарахтларни суғоришга ишлатиш мақсадга мувофиқ экани таъкидланганди. Умуман, пойтахтдаги туман ҳокимлари жойига чиқиб, дренаж, яшиллик, ободонлаштириш каби масалаларни тепасида туриб ўзи ҳал қилиши шартлиги айтилган.
Шавкат Мирзиёев январь ойида ўтказган видеоселектор йиғилишида пойтахтдаги дренаж тизими ёғингарчилик даврида аҳоли эътирозига сабаб бўлаётганини таъкидлаб, шаҳар ҳокимлиги олдига дренаж тизимидаги энг муаммоли нуқталарда қурилиш ишларини якунлаш ҳамда 1 сентябрга қадар пойтахт дренаж тизими мастер-режасини ишлаб чиқиш вазифасини қўйган эди.
Изоҳ (0)