Sog‘liqni saqlash vaziri Asilbek Xudayarovning aytishicha, belgilangan talablarga javob beradigan shifokorlar yuqori ish haqi olmoqda.
Statistika agentligi maʼlumotlariga ko‘ra, 2024-yil yanvar–sentyabr oylarida O‘zbekistonda o‘rtacha oylik ish haqi miqdori 5 million 151 ming so‘mga yetdi. Mazkur davrda mamlakatda sog‘liqni saqlash xodimlari boshqa sohadagilarga qaraganda eng kam o‘rtacha oylik ish haqi olgan – 3,3 million so‘m. Yaʼni bu miqdor respublika miqyosida belgilangan o‘rtacha oylik ish haqidan keskin past.
Toshkent shahrida 17–25-oktyabr kunlari o‘tkazilgan “Xalqaro hamkorlik tashabbuslari haftaligi” doirasida sog‘liqni saqlash sohasi bo‘yicha ham muloqotlar tashkil etildi. Tadbir yakunida sog‘liqni saqlash vaziri Asilbek Xudayarov “Daryo” muxbirining shifokorlar oyligi nega kamligi to‘g‘risidagi savoliga javob qaytardi. Vazirlik rahbarining aytishicha, tegishli shartlarni bajargan shifokorlarga yuqori oylik to‘lanmoqda.
“Tibbiyot muassasalarida KPI tizimi yo‘lga qo‘yilyapti. Hozir birlamchi bo‘g‘inda rejalashtirayotgan ishlarimiz bor. Oylik masalasiga to‘xtalsak, tibbiyot xodimlariga 7 turdagi imtiyozlar berilgan. Baʼzilariga to‘xtalib o‘taman. Masalan, yuqori malakali mutaxassislar uchun oylik ish haqiga 75 foizlik ustamalar belgilangan. Uzoq hududlarga borib ishlaydigan mutaxassislar uchun ham ustamalar bor. Xususan, Qoraqalpog‘istonning 6 ta tumaniga borib ishlagan shifokorlar oyligiga 100 foizlik, Mo‘ynoqda faoliyat yuritayotganlarga 200 foizlik ustamalar berilishi belgilangan. Bundan tashqari, ilmiy salohiyati bo‘yicha ham ustamalar mavjud. Jumladan, tibbiyot fanlari nomzodi 30 foizlik, tibbiyot fanlari doktori uchun 60 foizlik ustamalar qo‘yilgan”, dedi vazir.
Asilbek Xudayarov mamlakat sog‘liqni saqlash sohasiga yangi tizim joriy etish ishlari ketayotganini ham aytib o‘tdi.
“Biz davlat byudjet xizmatlari bilan birga aholiga ko‘rsatilayotgan servis xizmatlarini kuchaytirmoqchimiz. Bu jarayon 2024-yil yakuni va 2025-yilda ishga tushadi. Yaʼni eng chekka tumanlarda ham aralash turdagi xizmat ko‘rsatish tizimi yo‘lga qo‘yiladi. Xizmatlar davlat byudjeti tomonidan kafolatli amalga oshiriladi. Servis xizmati esa qo‘shimcha bo‘ladi. Servis xizmatida ishtirok etadigan shifokorlar, hamshiralar, sanitar xodimlar va boshqa ishchilar bazaviy oyligiga olinadigan daromaddan qo‘shimcha pullar to‘lanishi taʼminlanadi”, dedi vazirlik rasmiysi.
Avvalroq vazir mamlakatda yuz bergan “Dok-1 Maks” fojeasi sabab nogiron bo‘lib qolgan bolalar davlat tomonidan tibbiy xizmat ko‘rsatilayotganini aytgandi. Keyin farzandi 2022-yil dekabr oyida “Dok-1 Maks”dan zaharlangan va 65 kun komada yotgan fuqaro Feruz Nuritdinov vazir jamoatchilikka yolg‘on maʼlumot berganini aytib chiqdi. Nuritdinovga ko‘ra, uning farzandi holidan davlat birorta shifoxonasi shifokori, biror marta ham xabar olmagan.
Izoh (0)