Jizzaxda aliment to‘lamagan ota 15 sutkaga qamaldi. Bu haqda viloyat hokimligi matbuot xizmati xabar berdi.
Fuqarolik ishlari bo‘yicha Jizzax tumanlararo sudining ijro hujjatiga asosan qarzdor D.I.dan alimentdan bo‘lgan qarzni undirish Prokuratura byurosining Sharof Rashidov tuman bo‘limi ish yurituviga kelib tushgan. Bo‘lim davlat ijrochisi tomonidan qarzdorga nisbatan tegishli hujjatlar rasmiylashtirilib, ko‘rib chiqish uchun Jinoyat ishlari sudiga yuborilgan.
Sud jarayonida qarzdor o‘z aybiga iqror bo‘lib, aliment to‘lovlarini o‘z vaqtida to‘lay olmaganini, oilaviy sharoiti og‘irligi sababli hozir ham aliment to‘lovlarini to‘lab bera olmasligini aytib, unga qonuniy yengillik berishni so‘ragan.
Undiruvchi sudda, farzandlarining otasi aliment to‘lovlarini o‘z vaqtida to‘lamasligini, farzandlarini bir o‘zi juda qiynalib, tarbiyalayotganini, qarzdordan aliment to‘lovlarini to‘liq undirib berib, unga nisbatan qonuniy chora ko‘rishni so‘ragan.
Sud jarayonida qarzdorning aybi, uning o‘z aybiga iqrorlik va qilmishidan chin ko‘ngildan pushaymon bo‘lib bergan ko‘rsatuvidan tashqari, tushuntirish xatlari, maʼmuriy bayonnoma va ishda to‘plangan boshqa yozma dalillar bilan o‘z isbotini topgan.
Sud qaroriga asosan qarzdor Maʼmuriy javobgarlik to‘g‘risidagi kodeksning tegishli moddasida ko‘rsatilgan huquqbuzarlikni sodir qilganlikda aybdor deb topilib, unga nisbatan 15 sutka maʼmuriy qamoq jazosi tayinlangan.
Qarzdor ota sud zalida darhol qamoqqa olinib, jazoni o‘tash uchun maxsus muassasaga joylashtirilgan.
Izoh (0)