Samarqand viloyati Nurobod tumanida 5 yashar bola tok urishi oqibatida vafot etdi. Bu haqda Bolalar ombudsmani xabar berdi.
Aniqlanishicha, 16-may kuni Samarqand viloyati Nurobod tumanida yashovchi, 2019-yilda tug‘ilgan R.M. tok urishi natijasida vafot etgan.
Tuman prokuraturasi tomonidan tuzilgan tezkor-tergov guruhi hodisa joyiga chiqib holat o‘rganilganda, “Omondara” MFY, Chunqaymish qishlog‘i hududidagi tepalikdan o‘tgan elektr simini voyaga yetmagan R.M. ushlashi oqibatida elektr toki urib, voqea joyida vafot etgani aniqlangan.
Tezkor-tergov guruhi tomonidan hodisa joyi ko‘zdan kechirilib, R.M.ning o‘limi sabablarini aniqlash maqsadida sud-tibbiy ekspertiza tayinlangan.
Shuningdek, holat yuzasidan “Samarqand viloyat hududiy elektr tarmoqlari” AJga xizmat tekshiruvi tayinlangan. Hozirda Nurobod tumani prokuraturasi tomonidan tergovga qadar tekshiruv harakatlari olib borilmoqda.
Bolalar ombudsmani bola manfaatlari nuqtayi nazaridan holat bo‘yicha o‘z kuzatuvini davom ettiradi.
Avvalroq Toshkentdagi maktabda 8-sinf o‘quvchisi tok urib vafot etishi ortidan ushbu maktab direktori o‘rinbosari qamoqqa olingan edi. Sud hukmiga ko‘ra, maktab direktori va direktor o‘rinbosari Jinoyat kodeksining 207-moddasi (mansabga sovuqqonlik bilan qarash) 3-qismi “a” bandida nazarda tutilgan jinoyatni sodir etganlikda aybli deb topilgan. Ularga 2 yil muddatga mansabdorlik va moddiy javobgarlik yuklatilgan lavozimlarda ishlash huquqidan va 4 yilga ozodlikdan mahrum qilish jazosi tayinlangan.
Izoh (0)