Energetika vazirligi elektromobillarni quvvatlantirish stansiyalarini o‘rnatish va tarmoqqa ulash tartib taomillari soddalashtirilganini ma’lum qildi.
Qayd etilishicha, prezidentning “O‘zbekiston — 2030” strategiyasini 2024-yilda amalga oshirishga oid davlat dasturi to‘g‘risida farmoni bilan, yuridik shaxslar tomonidan elektromobillarni quvvatlantirish stansiyalarini o‘rnatish va tarmoqqa ulash uchun ruxsat olish 1 oydan ko‘p bo‘lmagan muddatda amalga oshiriladi.
Energetika vazirligining buyrug‘iga muvofiq “Hududiy elektr tarmoqlari” AJ va “O‘zenergoinspeksiya” quvvatlantirish stansiyalarini tarmoqqa ulash uchun ruxsat olish jarayonlarini belgilangan muddatlarda kelishib berilishini taʼminlaydi.
Vazirlik aholini energiya resurslari bilan taʼminlash va atrof-muhitni himoya qilishga xizmat qiluvchi mazkur turdagi faoliyatlar Energetika vazirligi tomonidan qo‘llab-quvvatlanayotganini bildirdi.
O‘zbekistonda “yashil energetika”ni qo‘llab-quvvatlash, ekologik muammolarning oldini olish va zararli oqibatlarni kamaytirish maqsadida aholini elektromobillarga o‘tishini rag‘batlantirish tizimi joriy etilishi belgilangan.
Bunday toifadagi avtomobillar uchun davlat raqamlarini berishda undiriladigan to‘lov miqdorlari kamaytiriladi.
Izoh (0)