Shavkat Mirziyoyev 3-aprel kuni Samarqand sammiti doirasida mamlakatda tashrif bilan bo‘lib turgan Yevropa kengashi prezidenti Antoniu Koshta va Yevropa komissiyasi prezidenti Ursula fon der Lyayen bilan uchrashuv o‘tkazdi. Bu haqda Prezident matbuot xizmati xabar berdi.
Unda O‘zbekiston bilan Yevropa ittifoqi o‘rtasidagi ko‘p qirrali hamkorlikni, eng avvalo, savdo-iqtisodiyot va investitsiya sohalarida yanada rivojlantirish va mustahkamlash masalalari atroflicha ko‘rib chiqildi. Turli darajalardagi faol muloqotlar va sermahsul almashinuvlar, amaliy hamkorlikning institusional mexanizmlari doirasida samarali ishlar olib borilayotgani qayd etildi. Kengaytirilgan sheriklik va hamkorlik to‘g‘risidagi bitim imzolanishga tayyorlanmoqda.
O‘zbekistonning Yevropa ittifoqi mamlakatlari bilan tovar ayirboshlash hajmi barqaror ortib bormoqda. Yevropaning yetakchi kompaniyalari ishtirokidagi investitsiya loyihalari portfeli 30 milliard yevrodan ziyodni tashkil etmoqda. Mamlakat Yevropa tiklanish va taraqqiyot bankining yirik benefisiari hisoblanadi, Toshkent shahrida Yevropa investitsiya bankining mintaqaviy vakolatxonasi ochilmoqda.
Yevropa ittifoqining bosh institutlari rahbarlari Yangi O‘zbekistonni barpo etish bo‘yicha amalga oshirilayotgan iqtisodiy islohotlar dasturini, shuningdek, Markaziy Osiyoda yaxshi qo‘shnichilik, ishonch va sheriklikni mustahkamlash borasidagi siyosatni yuksak baholadi va qat’iy qo‘llab-quvvatlashlarini bildirdi.
Muzokaralarda asosiy e’tibor innovatsiyalar, “yashil” energetika, tog‘-kon tarmog‘i, qishloq xo‘jaligi, transport, logistika, raqamlashtirish va boshqa yo‘nalishlarda qo‘shma dastur va kooperatsiya loyihalarini ilgari surishga qaratildi. Turizm, madaniyat, fan, ta’lim va sog‘liqni saqlash sohalaridagi faol almashinuvlarni davom ettirish muhimligi qayd etildi.
Bo‘lajak “Markaziy Osiyo—Yevropa ittifoqi” formatidagi birinchi oliy darajadagi sammit kun tartibidagi masalalar hamda Yevropaning “Global darvoza” strategiyasi doirasida ikki mintaqaning o‘zaro bog‘liqligini kuchaytirish istiqbollari muhokama qilindi.
Xalqaro va mintaqaviy siyosatning dolzarb jihatlari, jumladan, Afg‘onistonning ijtimoiy-iqtisodiy rivojlanishiga ko‘maklashish masalalari yuzasidan ham fikr almashildi.
Yevropa investitsiya Bankining (EIB) mintaqaviy vakolatxonasi — bu bankning muayyan mintaqada, masalan, Markaziy Osiyoda, Yevropa ittifoqi tomonidan moliyalashtiriladigan investitsiya loyihalarini muvofiqlashtirish va rivojlantirish uchun tashkil etilgan rasmiy vakillik idorasi hisoblanadi.
Uning asosiy vazifalari:
- Moliyaviy hamkorlikni rivojlantirish – Mintaqadagi davlat va xususiy sektor bilan ishlash orqali infratuzilma, ekologiya, energetika va tadbirkorlikni rivojlantirishga qaratilgan loyihalarni qo‘llab-quvvatlash.
- Mahalliy loyihalarni moliyalashtirish – Barqaror rivojlanish, yashil iqtisodiyot, qayta tiklanuvchi energiya manbalari, transport va boshqa sohalarda sarmoyalar ajratish.
- Hamkorlikni kuchaytirish – Hukumatlar, xalqaro moliya institutlari va tadbirkorlar bilan yaqin aloqalarni rivojlantirish orqali loyihalarning samaradorligini oshirish.
- Texnik yordam va maslahat berish – Moliyalashtirilayotgan loyihalarning sifatini ta’minlash va ularni xalqaro standartlarga muvofiq amalga oshirishda ko‘maklashish.
- Barqaror investitsiyalarni jalb qilish – Mintaqadagi biznes va davlat sektoriga uzoq muddatli sarmoyalarni yo‘naltirish, iqtisodiy o‘sishni qo‘llab-quvvatlash.
“Markaziy Osiyo—Yevropa ittifoqi” birinchi sammiti
Ushbu sammit Samarqand shahrida 3—4-aprel kunlari bo‘lib o‘tadi. Shavkat Mirziyoyev raisligida o‘tadigan sammit ishida Yevropa kengashi prezidenti Antoniu Koshta, Yevropa komissiyasi prezidenti Ursula fon der Lyayen, Qozog‘iston respublikasi prezidenti Qosim-Jo‘mart To‘qayev, Qirg‘iz Respublikasi prezidenti Sadir Japarov, Tojikiston prezidenti Emomali Rahmon va Turkmaniston prezidenti Serdar Berdimuhamedov ishtirok etadi.
“Markaziy Osiyo—Yevropa ittifoqi” birinchi sammitining ishbilarmonlik dasturi Shavkat Mirziyoyev va Yevropa tiklanish va taraqqiyot banki prezidenti Odil Reno-Basso bilan uchrashuvidan boshlandi. 3-aprel kuni sammitda ishtirok etadigan yana bir qator delegatsiyalar rahbarlari bilan qator ikki tomonlama muzokaralar o‘tkazilishi rejalashtirilgan. 4-aprel kuni Markaziy Osiyo davlatlari va Yevropa ittifoqining asosiy institutlari rahbarlari ishtirokida ko‘p tomonlama tadbirlar bo‘lib o‘tadi.
Izoh (0)