Мамлакатда тўланмаган солиқлар миқдори 8,5 триллион сўмга етган. Бу ҳақда бугун, 1 апрель куни Тошкент шаҳрида журналистлар билан ўтказилган мулоқотда Солиқ қўмитаси раиси биринчи ўринбосари Мубин Мирзаев маълум қилди.
Суҳбатда журналистлар қўмита вакилларидан республикадаги солиқ қарздорлиги миқдорини сўраган. Мубин Мирзаевнинг таъкидлашича, жорий йилда муддати ўтаган солиқлар 10 фоиздан ортмайди.
“Бугунги кунда 8,5 триллион сўмлик тўланмаган солиқлар бор. Март ойида илк бор бундай солиқларни 140 миллиард сўмга камайтирдик. Тўланмаган солиқлар 2024 йилда бир мунча ошди. Бугун солиқ қарздорлигини ундириш бўйича ўзимизга қатъий режа белгилаб олганмиз. 2025 йилда бу қарздорлик 10 фоиздан оширмаслик режа қилинган”, деди қўмита вакили.
Солиқ қўмитаси берган маълумотларга кўра, 2025 йил 1 март ҳолатига солиқ қарзи 100 млн сўмдан юқори ишлаб чиқариш корхоналари сони 978 тани ташкил этган. Уларнинг жами солиқ қарздорлиги 1,3 триллион сўмдан кўп. Қарзлардан 385,5 миллиард сўми (28,2 фоизи) 10 та корхона ҳисобига тўғри келади.
Шу билан бирга, солиқ қарзи 100 миллион сўмдан юқори қурилиш корхоналари сони 1091 та бўлиб, жами қарздорлик миқдори 1,1 триллион сўмдан ортиқ. Шундан 506,1 млрд сўми (42,7 фоизи) солиқ қарзи энг йирик бўлган 10 та корхона зиммасида.
2025 йил 1 январь ҳолатига мамлакатдаги 129 099 та ташкилотнинг 441,2 минг нафардан зиёд ходимида 337,9 миллиард сўм (ер солиғи — 210,1 миллиард сўм, мол-мулк солиғи — 127,8 миллиард сўм) тўланмаган солиқ қарздорлиги мавжуд бўлган. Шундан 62,4 миллиард сўми бюджет, 10,3 миллиард сўми нодавлат-нотижорат ва 265,2 миллиард сўми тижорат ташкилотлари ходимлари ҳисобига тўғри келган.
Изоҳ (0)