Xalq bankining Toshkent shahar Qatortol ko‘chasidagi sobiq bosh ofisi binosi sotuvi yakunlandi. Obyekt Oasis Samarkand kompaniyasiga 119,7 milliard so‘mga sotildi.
Bino bank kuzatuv kengashining 2024-yil boshidagi qaroriga muvofiq onlayn auksionga qo‘yilgan, boshlang‘ich narxi – 114 milliard so‘m bo‘lgan. Savdo oshirib borish uslubida o‘tkazilgan.
Auksion 15 daqiqa davom etgan, unda ikki ishtirokchi qatnashgan. Spot nashrining yozishicha, Oasis Samarkand taklif bergan yagona ishtirokchi bo‘lib, boshlang‘ich narxdan 5 foiz yuqori narx, 119,71 milliard so‘m taklif bilan g‘olib bo‘lgan.
Bino 1995-yilda qurilgan bo‘lib, Toshkent shahri Chilonzor tumani Qatortol ko‘chasida joylashgan. Yer uchastkasining umumiy maydoni 0,5 gektar, olti, besh va ikki qavatli uchta ofis binolarini o‘z ichiga oladi. Binolarning umumiy maydoni 9242 kvadrat metrni tashkil qiladi. Bino bilan birga umumiy quvvati 50 kVt bo‘lgan quyosh panellari ham sotilgan.
.jpg)
Ochiq maʼlumotlarga ko‘ra, g‘olib Oasis Samarkand MCHJ 2013-yilda Samarqand shahrida tashkil qilingan. Faoliyati – restoranlar va oziq-ovqat mahsulotlari yetkazish bo‘yicha xizmatlar ko‘rsatish, ustav fondi – 2,26 milliard so‘m. Kompaniyaning 100 foiz ulushdori – Dalerov Amir Dilshodovich.
Amir Dalerov, shuningdek, Sidi Med kompaniyasi (Zarmed diagnostika markazi), Samarkand-Zarmed Universiteti va New Techno Age ta’lim muassasasida ham ulushlarga ega.
Eslatib o‘tamiz, 2023-yilda Toshkent markazidagi “Aloqabank” bosh ofisi va Raqamli texnologiyalar vazirligiga tegishli ofis binolari auksionda umumiy 387 mlrd so‘mga sotilgandi.
Izoh (0)