Toshkent shahri Uchtepa tumanida bo‘sh turgan sobiq avtojamlanma bino va inshootlarini sotish bo‘yicha kelishuvga erishildi. Bu haqda Davlat aktivlarini boshqarish agentligi xabar berdi.
Qayd etilishicha, Mannon Uyg‘ur ko‘chasi, 487a uy manzilida joylashgan sobiq “2512 Avtojamlanma” DUKning avtobaza bino va inshootlari ommaviy savdo jarayonlarining barcha bosqichlari “E-auksion” elektron savdo platformasi orqali amalga oshirilgan.
Savdolarda 7 nafar talabgor ishtirok etishga qiziqish bildirib, o‘z takliflarini taqdim etgan.
Obyektni sotib olish uchun qo‘yilgan talablarga to‘liq javob bergan Evro Tyres Universal MCHJ tomonidan taklif etilgan 105 milliard so‘m narx taklifi boshqa talabgorlar tomonidan taklif etilgan narx takliflaridan yuqori hamda mustaqil baholash tashkilotining baholagan narx qiymatidan sezilarli darajada yuqori bo‘lgani sababli, ushbu kompaniya ommaviy savdo g‘olibi deb topilgan.
Bundan tashqari, obyektni xususiylashtirish natijalari Davlat aktivlarini xususiylashtirish va xususiylashtirish jarayonlarini muvofiqlashtirish davlat komissiyasining tegishli qarori bilan maʼqullangan.
Eslatib o‘tamiz, 2023-yil aprel oyida Toshkent shahar Chilonzor tumani Novza ko‘chasidagi ma’muriy bino va inshootlar kimoshdi savdosiga qo‘yilgandi. Fevralda esa Samarqand viloyati Qo‘shrabot tumani “Qo‘rg‘on” qishlog‘idagi molxona va agrofirma inshootlari kimoshdi savdosiga chiqarilishi aytilgan edi.
Izoh (0)