Xorazm viloyati Urganch shahrida 17 yoshli bolaning ko‘p qavatli uydan tushib ketgani yuzasidan tekshiruv harakatlari olib borilmoqda. Bu haqda Bosh prokuratura matbuot xizmati boshlig‘i ma’lum qildi.
Ijtimoiy tarmoqlarda tarqalgan videoda yuqori qavatdan tushib ketgan bola avtoturargohdagi Captiva ustiga tushganini ko‘rish mumkin.
Qayd etilishicha, Urganch shahrida 2007-yilda tug‘ilgan voyaga yetmagan bola ko‘p qavatli uyning 5-qavatidan avtomashina ustiga tushgan holati yuzasidan prokuratura tomonidan tergovga qadar tekshiruv harakatlari olib borilmoqda.
Hozirda jabrlanuvchi shifoxonaga yotqizilib, unga zarur tibbiy yordam ko‘rsatilmoqda. Sodir bo‘lgan hodisaning sabablari aniqlanmoqda, — deb yozadi Hayot Shamsutdinov.
Yuqori qavatdan tushib ketish holatlari
2022-yil iyun oyida Samarqand shahridagi ko‘p qavatli binoning balkon qismidan 1,5 yoshli qizcha yiqilib tushib, vafot etgandi. Shuningdek, Toshkentdagi ko‘p qavatli uyning 11-qavatidan 1,5 yashar bola tushib ketgani haqida xabar qilingan edi. 2022-yil dekabrda esa Rossiyaning Sankt-Peterburg shahri Petrogradskiy tumanida o‘zbekistonlik ishchi 7-qavatdan tushib ketib, vafot etgani, shu yilning aprel o‘rtalarida esa Toshkent shahri Bektemir tumanidagi 289-maktabda 11-sinf o‘quvchisi 3-qavatdan tushib ketgani to‘g‘risida xabar berilgandi.
Izoh (0)