“Daryo” Toshkent shahar Olmazor tumanidagi “Chorsu” bozoridagi do‘konlardan birida chiqqan yong‘in oqibatlari aks etgan fotosuratlarni e’lon qilgan edi. Do‘kon egalaridan biri shaxsini oshkor etmaslik iltimosi bilan hodisa tafsilotlarini qisqacha bayon etdi.
Bugun soat 07:30 lar atrofida do‘konga kelsak, tutashga ko‘zimiz tushdi. Menimcha, elektrdagi qisqa tutashuvdan keyin eshikni ochganimizda kislorod kirgach, olov alangalab ketdi. O‘chirishga harakat qildik, biroq qo‘limizdan kelmadi. Shunga yong‘in-qutqaruv xizmatiga qo‘ng‘iroq qildik. O‘t o‘chiruvchilar tez yetib kelib, yong‘inni o‘chirishdi, baraka topishsin. Kuzatuv kameralarimizdan qaradik, biz buni rozetkadan kelib chiqqan qisqa tutashuv sabab, deb o‘ylayapmiz.
Do‘konning, menimcha, 50 foiz qismiga zarar yetdi, deb o‘ylayman. Taxminan 5-6 million so‘mlik tovar yonib ketdi. Biroq bundan ham ko‘proq bo‘lishi mumkin. Tepa qismidagi tovarlarimizning ayrimlariga ziyon yetmagan. Yong‘in-qutqaruv xizmatiga bog‘langanimda mendan avval ham boshqalar telefon qilishgan ekan. 10 daqiqada yetib kelib, 1 soatga qolmay hamma ishni tugatishdi. 2-3 do‘konga birozgina zarar yetdi, xolos. Bugundan hammayoqni tartibga keltirib, do‘konimizni ta’mirlab, ko‘rmagandek qilib qo‘yamiz.
Yong‘in oqibatida halok bo‘lgan va jabrlanganlar yo‘q.
Hozirda yong‘in sababi va keltirilgan moddiy zarar miqdori aniqlanmoqda.
Izoh (0)