“Дарё” Тошкент шаҳар Олмазор туманидаги “Чорсу” бозоридаги дўконлардан бирида чиққан ёнғин оқибатлари акс этган фотосуратларни эълон қилган эди. Дўкон эгаларидан бири шахсини ошкор этмаслик илтимоси билан ҳодиса тафсилотларини қисқача баён этди.
Бугун соат 07:30 лар атрофида дўконга келсак, туташга кўзимиз тушди. Менимча, электрдаги қисқа туташувдан кейин эшикни очганимизда кислород киргач, олов алангалаб кетди. Ўчиришга ҳаракат қилдик, бироқ қўлимиздан келмади. Шунга ёнғин-қутқарув хизматига қўнғироқ қилдик. Ўт ўчирувчилар тез етиб келиб, ёнғинни ўчиришди, барака топишсин. Кузатув камераларимиздан қарадик, биз буни розеткадан келиб чиққан қисқа туташув сабаб, деб ўйлаяпмиз.
Дўконнинг, менимча, 50 фоиз қисмига зарар етди, деб ўйлайман. Тахминан 5-6 миллион сўмлик товар ёниб кетди. Бироқ бундан ҳам кўпроқ бўлиши мумкин. Тепа қисмидаги товарларимизнинг айримларига зиён етмаган. Ёнғин-қутқарув хизматига боғланганимда мендан аввал ҳам бошқалар телефон қилишган экан. 10 дақиқада етиб келиб, 1 соатга қолмай ҳамма ишни тугатишди. 2-3 дўконга бир озгина зарар етди, холос. Бугундан ҳаммаёқни тартибга келтириб, дўконимизни таъмирлаб, кўрмагандек қилиб қўямиз.
Ёнғин оқибатида ҳалок бўлган ва жабрланганлар йўқ.
Ҳозирда ёнғин сабаби ва келтирилган моддий зарар миқдори аниқланмоқда.
Изоҳ (0)