Ijtimoiy tarmoqlarda Toshkent shahridagi ko‘p qavatli uyda bir xonadon qarzi tufayli butun qavatda ichimlik suvi o‘chirilgani haqida xabar tarqaldi. Bu bo‘yicha “Toshkent shahar suv taʼminoti” AJ munosabat bildirdi.
Voqea Chilonzor tumani 19-dahasidagi 10 uyda sodir bo‘lgani aytilmoqda. Bitta xonadon ichimlik suvidan qarzdorligi sabab “O‘zsuvtaʼminot” xodimi to‘rtinchi qavatdagi barcha xonadonlarni suvdan uzib qo‘ygan. Yaʼni qarzi yo‘q uy egalari ham suvsiz qoldirilgan. Xodim suvni o‘chirayotgani bo‘yicha hech kimni ogohlantirmagan.
“Toshkent shahar suv taʼminoti” AJ matbuot kotibi Ravshan Yoqubjonov holat yuzasidan tashkilot munosabatini eʼlon qildi.
“Holat o‘rganilganda hududiy nozir bitta xonadonga bir necha bor qarzni undirish uchun kelgan. Ammo buning uddasidan chiqolmagan. Qarzdor xonadonning o‘zini suvdan uzishga esa imkon bo‘lmagan. Inspektor o‘zboshimchalik bilan yo‘lakdan bir necha xonadonga tortilgan quvurni asosiy tarmoqdan uzgan. Buning natijasida suvdan qarzdorligi bo‘lmagan xonadonlar ham bir muddat suvsiz qolgan va haqli eʼtirozga sabab bo‘lgan. Holat qisqa muddatda bartaraf etilgan. Inspektor holat takrorlanmasligi bo‘yicha qatʼiy ogohlantirilgan”, deya maʼlum qilgan matbuot kotib.
Ravshan Yoqubjonov munosabatga xulosa sifatida kinoyali gaplar yozgan. “Nega suv taʼminoti korxonasi o‘z vazifasini bajargan holda haqini olish uchun isteʼmolchi bilan mushuk-sichqon o‘ynashi kerak”? Bu na meʼyorga na vijdonga to‘g‘ri keladigan ishmi”, deb qayd etgan u.
Yoqubov bunday fikrlar bilan yuqoridagi holatni oqlamoqchi emasligi, biroq har kim zimmasidagi vazifasini vijdonan, qonunan bajarishi lozimligini eslatib qo‘ygan.
Izoh (0)