Jangari filmlarda qahramonlar ko‘pincha tirilib, o‘q yaralaridan omon qolib, qulagan binolar ostidan chiqib ketishadi. Lekin ba’zan katta ekran ortida ham shunday holatlar yuz berib turadi. Mashhur Gollivud aktyorlarning yuraklari turli sabablar bilan urishdan to‘xtaydi. Ammo zamonaviy tibbiyot, hayotga bo‘lgan kuchli iroda va omad tufayli ular yana hayotga qaytib, hech narsa bo‘lmaganday kinoda rol ijro etishni davom etishadi. Ushbu maqolada kino yulduzlari hayotida sodir bo‘lgan shunday voqealar haqida so‘z boradi.
Bob Odenkirk — suratga olish maydonchasida yurak xurujiga uchradi
2021-yil iyul oyida, “Yaxshisi Soulga qo‘ng‘iroq qiling” serialining so‘nggi mavsumi suratga olinayotganda, 58 yoshli Bob Odenkirk birdaniga hushini yo‘qotdi.
Yaxshiyamki, maydondagi mashinaning yukxonasida defibrillyator bilan tibbiyot xodimi bo‘lgan. Jamoaning boshqa a’zolari yurak va o‘pka reanimatsiyasini boshlashga ulgurdi. Ammo Bobning ahvoli yaxshilanmagach, tibbiyot xodimi aktyorni hayotga qaytarish uchun defibrillyatorni uch marta qo‘llashga majbur bo‘ldi. U aytishicha, uchinchi natija juda muhim bo‘lgan.
Agar “Hech kim” filmidagi yaxshi jismoniy holatim, shuningdek, aktyorlar va jamoaning tezkor harakatlari bo‘lmaganda, men hozir bu yerda bo‘lmasdim, deydi Odenkirk.
Voqeadan so‘ng Bob Odenkirk sog‘lig‘ini tiklash uchun shifokorlar nazoratida bo‘ldi va bir necha oy ichida “Yaxshisi Soulga qo‘ng‘iroq qiling” serialining so‘nggi mavsumini yakunladi. Ushbu hodisaga qaramay, Bob faoliyatini davom ettirdi va hozirgi kunda yangi loyihalarda faol suratga tushmoqda.
Jeremi Renner — qor tozalash mashinasi ostida qolib, mo‘jiza bilan omon qoldi
2023-yilning 1-yanvarida Jeremi Renner Nevada shtatidagi uyining yaqinida dahshatli baxtsiz hodisani boshdan kechirdi. U qo‘shnisining qor ichida qolib ketgan mashinasini chiqarishga yordam bermoqchi bo‘lganida, og‘irligi 6 tonnadan ortiq bo‘lgan qor tozalash traktori tasodifan unga qarab harakatlana boshladi va aktyorni bosib ketdi.
Renner 30 dan ortiq suyak sinishi, o‘pka yorilishi va ko‘krak qafasining shikastlanishi kabi juda og‘ir jarohatlar oldi. Shifokorlarning aytishicha, Jeremi klinik o‘lim holatini boshdan kechirgan va unga juda omad kulib boqdi — tezda vertolyot bilan shifoxonaga olib ketilib, favqulodda yordam ko‘rsatildi.
U reanimatsiyada 12 kun og‘ir ahvolda yotdi.
Klinik o‘lim paytida men sokinlik va zavqni his qilganman, vaqt va makondan tashqarida edim. Qaytishni xohlamadim va uyg‘onganimda shifokorning yuzini ko‘rib, biroz hayron qoldim, deydi Jeremi.
Qiyinchiliklarga qaramay, Renner bu tajriba uchun taqdirdan minnatdor bo‘lib, u uni irodali qilganini, hayot hamda qadriyatlarni boshqacha anglashga yordam berganini aytdi.
Jarohatlar og‘ir bo‘lishiga qaramay, Jeremi sog‘ayib, 2024-yilda yana suratga olishlarga qaytdi. Uning voqeasi jasorat va chidamlilik ramziga aylandi.
Al Pachino — COVID-19 asoratlari tufayli reanimatsiyada bo‘ldi
COVID-19 pandemiyasi vaqtida 84 yoshli afsonaviy aktyor Al Pachino hayot va o‘lim o‘rtasida qoldi, chunki uning yuragi to‘xtab qoldi.
Men uyda o‘tirgan edim, o‘zimni yomon his qildim va birdan hamma narsa ko‘z oldimdan g‘oyib bo‘ldi. Keyin bilsam, nafas olishim qiyinlashyapti va yuragim yomon uryapti, eslaydi Pachino.
Atrofdagilar darhol shifokorlarni chaqirishdi. Himoya kiyim kiygan 6 nafar tez yordam xodimi va ikki shifokor keldi. Ular aktyorda hech qanday alomatlarni topmay, darhol favqulodda reanimatsiyani boshlashdi.
Aktyor shifokorlarning “U qaytdi. U shu yerda” degan so‘zlarini, qandaydir suv ostida eshitgandek eslaydi.
Bu so‘zlar Al Pachino yuragi yana urishni boshlagan paytda aytilgan edi.
Keyinchalik aktyor “oq nur” ko‘rmaganini va an’anaviy “o‘lim yaqinligi” tajribasini boshdan kechirmaganini tan oldi. Aksincha — faqat bo‘shliqni his qilgan.
Shifokorlar rasmiy ravishda yurak to‘xtaganini tasdiqlashdi va aktyorni o‘limdan qaytarishdi.
Al Pachino faqat hayotga qaytmadi, balki kinoda ishlashni davom ettirdi va 84 yoshida ota ham bo‘ldi. Bu esa haqiqiy afsonaning kamida to‘qqiz hayoti borligining yana bir isboti.
Jeymi Foks — insult, reanimatsiya va 20 kunlik koma
2023 -yil aprel oyida ma’lum bo‘ldiki, Jeymi Foks Atlantada “Yana ishda” filmi suratga olinayotgan paytda favqulodda shifoxonaga yotqizilgan.
Uning oilasi aktyorda jiddiy tibbiy hodisa yuz berganini aytgan, ammo tafsilotlar uzoq vaqt sir saqlangan.
Keyinchalik intervyuda Foks miyasida qon quyilishi (insult) sodir bo‘lganini aytdi. Shifokorlarning so‘zlariga ko‘ra, uni reanimatsiyaga bo‘limiga o‘tkazish kerak bo‘lgan va u 20 kun davomida komada yotgan. Holati juda og‘ir bo‘lgani uchun shifokorlar uning oilasiga yonida bo‘lishni maslahat bergan, chunki u hech qachon uyg‘onmasligi mumkin edi.
Men bir zum hushimni yo‘qotganman deb o‘yladim, lekin keyin bilsam, ikki-uch hafta “muzdek koma”da yotgan ekanman, so‘ngra hayotga qaytarishgan. Men do‘zaxdan o‘tib, qaytib keldim, deydi Foks.
Kutilmagan holatda, Foks sog‘ayib, yana kinoda ishlashni boshladi. Shifokorlar aktyorning omon qolishini aqlga sig‘mas darajada omadli holat deb baholashdi.
Jerard Batler — suratga olish paytida cho‘kib ketib, nafas olmay qoldi va hayotga qaytarildi
“300 spartalik”, “Olimp qulaganida” kabi filmlari bilan tanilgan aktyor Jerard Batler “To‘lqin zabt etuvchilari” (syorfer Jay Moryarti haqidagi biografik film) suratga olinayotgan paytda deyarli halok bo‘lishga sal qolgan.
Voqea Kaliforniya shimolida, ulkan va xavfli to‘lqinlari bilan mashhur bo‘lgan Maveriks nuqtasi yaqinida yuz bergan.
Bir sahnani suratga olayotganida, Batler syorf taxtasidan tushib ketadi va ulkan to‘lqin uni bosib qoladi. U suv ostiga cho‘kib, kuchli girdoblarda bir necha marta aylangan. Nafas olishga uringan aktyorni suv pastga qayta-qayta tortib ketgan.
Vaziyatni qirg‘oqdan kuzatayotgan syorfing bo‘yicha instruktorlar zudlik bilan yordamga oshiqadi va Batlerni suvdan hushsiz holda chiqarib oladi.
Aktyorning o‘zi bu voqeani hayotidagi eng dahshatli lahzalardan biri deb eslaydi. U shunday degan:
Meni suvdan chiqarishgach, zudlik bilan hayotga qaytarishga kirishishgan, hattoki defibrillyator ham ishlatishgan, chunki men nafas olmayotgan ekanman. Juda jiddiy holat bo‘lgan, deydi u.
Hayotga qaytgach, Batler bir kun davomida shifokorlar nazoratida kasalxonada qoladi. Tez orada tiklanib, suratga olish maydoniga qaytadi va film ustidagi ishni yakunlaydi.
Bu voqea uning hayotga bo‘lgan munosabatini o‘zgartirgan va har bir onni qadrlashni o‘rgatgan.
Izoh (0)