Qurbon hayitiga bir kun qolganida Balx viloyatining Mozori Sharif bozorida chorva mollari narxi ikki baravar qimmatlashdi. Xaridorlar narx-navoning qimmatligidan, chorva sotuvchilari bozor yo‘qligidan shikoyat qilmoqda. “Daryo” muxbiri Mozori Sharifdagi mol bozoriga borib, sotuvchi va xaridorlar bilan suhbatlashdi.
Qurbonlik uchun bozorga kelgan Nazar Muhammad har yili Qurbon hayitida bir qo‘yni 100 dollardan ham arzonga sotib olganini, bu yil esa narx ikki baravar oshgani uchun qurbonlik qilish uchun qo‘y sotib ololmayotganini aytadi.
“O‘tgan yili 6000 afg‘oniga qurbonlik uchun bir qo‘y sotib olganman, bu yil iqtisod zaifligi va qurbonlik narxi qimmat bo‘lgani uchun sotib olishga imkon yo‘q”, deydi Nazar Muhammad.
Chorva sotuvchilari esa o‘zlari ham boshqa viloyatlardan qimmat narxda sotib olayotganliklari, shu sababli qimmatroqqa sotishga majbur bo‘layotganliklarini aytishdi.
Ularning so‘zlariga ko‘ra, chorva mollari o‘tgan yillarga nisbatan kam, qimmatligi ham shundan.
Qurbonlik uchun qo‘y sotib olgani kelgan Din Muhammadning aytishicha, o‘tgan yillarda arafa kunlarida bu yerga sotish uchun 3-4 million sigir va qo‘y olib kelingan bo‘lsa, bu yil ushbu bozorda chorva mollari juda kam.
Bozor yo‘qligini xalq iqtisodining zaifligi bilan bog‘lab, ishsizlik, pul topish qiyinligi, odamlarning sotib olishga qurbi yo‘qligini aytdi.
Mozori Sharif bozorida chorva mollari narxi:
- Qo‘y — 8000 – 25 000 afg‘oni
- Echki — 8000 – 22 000 afg‘oni
- Sigir — 30 000 – 200 000 afg‘oni
- 1 kilogramm qo‘y go‘shtining narxi — 450 afg‘oni
- 1 kilogramm echki go‘shtining narxi — 450 afg‘oni
- 1 kilogramm mol go‘shti narxi — 380 afg‘oni
Izoh (0)