O‘zbekiston Afg‘onistonga Qurbon hayiti munosabati bilan insonparvarlik yordami yubordi. Bu haqda Surxondaryo viloyati hokimligi xabar berdi.
Qayd etilishicha, Shavkat Mirziyoyevning topshiriqlari bilan o‘zbek xalqining bag‘rikenglik va qo‘llab-quvvatlash ramzi sifatida “Qurbon hayiti” (Eid al-Adha) munosabati bilan Afg‘oniston aholisiga 183 tonna oziq-ovqat mahsuloti ortilgan navbatdagi insonparvarlik yordami yuklari Balx viloyatiga yetkazildi.
Insonparvarlik yuklari Hayraton shahridagi “Astras” kompaniyasi hududida O‘zbekiston prezidentining Afg‘oniston bo‘yicha maxsus vakili Ismatilla Ergashev, Surxondaryo viloyati hokimi Ulug‘bek Qosimov hamda Balx viloyati gubernatorining o‘rinbosari Nurulhodi Abuidris, shuningdek, ikki tomon rasmiylari ishtirokida topshirildi.
Insonparvarlik yordami tarkibidan un, guruch, shakar, makaron va qandolat mahsulotlari, o‘simlik yog‘i, tez tayyorlanadigan taomlar, qizil loviya va mosh o‘rin olgan.
Afg‘oniston rasmiylari O‘zbekiston prezidenti va xalqiga ko‘rsatayotgan insonparvarlik yordami uchun minnatdorlik bildirib, Qurbon hayiti munosabati bilan tabriklarini yo‘llagan.
O‘tgan yilning dekabr oyida prezident Shavkat Mirziyoyevning topshirig‘i bilan, Afg‘oniston aholisiga insonparvarlik yordami va “Salomatlik” poyezdi jo‘natilgandi.
Aprel oyida Surxondaryo viloyati hokimi Ulug‘bek Qosimov boshchiligidagi delegatsiya O‘zbekiston xalqi nomidan birodar afg‘on xalqiga navbatdagi insonparvarlik yordamini yetkazgan edi.
Mart oyida esa Navro‘z va Ramazon hayiti munosabati bilan O‘zbekiston Afg‘onistonga 200 tonnadan ortiq oziq-ovqat mahsulotlari ortilgan insonparvarlik yordami jo‘natilgan edi.
Shuningdek, 2023-yil aprelda ham O‘zbekistondan afg‘on xalqiga 185 tonnadan ortiq zaruriy oziq-ovqat mahsulotlari ortilgan navbatdagi insonparvarlik yordamini jo‘natgandi.
2022 yilda bo‘lsa zilzila oqibatida jabr ko‘rganlarga yordam ko‘rsatish maqsadida O‘zbekiston prezidenti Shavkat Mirziyoyev topshirig‘iga binoan Afg‘onistonga navbatdagi insonparvarlik yordami yuborilgan edi.
Izoh (0)