Qashqadaryo viloyatining Dehqonobod tumanida 27-oktyabr — Qonunchilik palatasi va mahalliy kengashlar deputatligiga saylov kuni bir fuqaro boshqa fuqaro xonadoniga kirib, keksa ayolga pichoq o‘qtalgani aytilmoqda. Bu haqda “Daryo”ga jabrlangan oila vakillari xabar bermoqda.
Uyimizga bostirib kirib, erkaklar uyda yo‘q payti pichoq olib kirib onamga pichoq o‘qtalgan yigit o‘zimizning kuyovimiz bo‘ladi. Ming afsuski, o‘sha kuni uyda faqat ayollar bo‘lgan. Ular qo‘rqib ketib, 102 ga qo‘ng‘iroq qilishgan. Ammo holatni o‘rgangan “uchastkavoy” uyga pichoq olib kirgan kuyovimizning tanishi bo‘lgani uchun ishni yopmoqda, deydi murojaatchilar.
Keksa ayolga pichoq o‘qtalish voqeasi tumanning chekka qishlog‘ida bo‘lgan.
Aslida singlimiz eri bilan tortishib qolib, uyga qaytgan bo‘lgan. Kuyov esa uni ona hovlisiga izlab kelib, onamga pichoq tiragan va topib berishini so‘ragan. 102 ga qilingan murojaat “uchastkavoy”ning xohishiga qarab yopilib ham ketishi mumkinmi?, deydi murojaatchi.
Qashqadaryo viloyat IIB axborot xizmati voqea sodir bo‘lganini tasdiqlar ekan, holat yuzasidan qonuniy chora ko‘rilishini aytdi.
Holat yuzasidan tergovga qadar surishtiruv ishlari olib borilmoqda, deydi “Daryo”ning bu haqdagi so‘roviga javob bergan mas’ul.
Izoh (0)